سفر نحميا
شرح وتلخيص الإصحاح الثاني + أسئلة شاملة للمراجعة والتحدي
مقدمة
في الإصحاح الأول شفنا نحميا لما وصله خبر حالة أورشليم وسورها المهدوم وأبوابها المحروقة، واتأثر جدا وصام وصلى لربنا وطلب منه المعونة.
لكن في الإصحاح الثاني هنشوف بداية تحرك نحميا علشان يحقق الهدف اللي كان في قلبه، وهنعرف إزاي ربنا فتح قدامه الطريق واستخدم الملك نفسه علشان يساعده.
يلا نبدأ نشوف الأحداث واحدة واحدة.
---
اولا: الملك يلاحظ حزن نحميا
نحميا 2 : 1 - 3
الأحداث هنا حصلت في شهر نيسان من السنة العشرين للملك ارتحشستا.
وكان نحميا بيقدم الخمر للملك، ودي كانت وظيفته في القصر، لكنه في اليوم ده كان حزين قدام الملك.
الملك لاحظ إن نحميا مش على طبيعته، فسأله ليه وشه حزين مع إنه مش مريض، وقال له إن ده أكيد حزن في القلب.
نحميا خاف جدا لما الملك سأله، وده مفهوم لأن الوقوف قدام الملك والتعبير عن الحزن بالشكل ده كان ممكن يكون موقف حساس.
لكنه رد على الملك بأدب وقال له إزاي ما يكونش حزين وقلبه موجوع والمدينة اللي فيها قبور آبائه خربانة وأبوابها اتحرقت بالنار.
نحميا هنا بدأ يوضح للملك سبب حزنه، وإن الموضوع مش مجرد مشكلة شخصية، لكنه حزن على حالة أورشليم.
ثانيا: نحميا يصلي ويطلب من الملك
نحميا 2 : 4 - 8
الملك سأله سؤال مهم جدا وقال له انت طالب ايه؟
وقبل ما نحميا يرد، صلى لإله السماء.
وده معناه إن حتى في اللحظة السريعة دي، وهو واقف قدام الملك، رفع قلبه لربنا وطلب معونته.
وبعدها طلب من الملك إنه يرسله إلى يهوذا، إلى المدينة اللي فيها قبور آبائه، علشان يبنيها.
الملك سأله عن المدة اللي هياخدها في السفر وعن ميعاد رجوعه، ونحميا حدد له وقت، والملك وافق إنه يروح.
وبعد كده نحميا طلب منه كمان خطابات يديها للولاة اللي هيعدي عليهم في الطريق علشان يسمحوا له بالمرور لحد ما يوصل يهوذا.
وطلب خطاب تاني لآساف حارس فردوس الملك، علشان يديله أخشاب يستخدمها في أبواب القلعة اللي جنب بيت الله، وفي سور المدينة، وكمان للبيت اللي هيقيم فيه.
والملك وافق على طلباته كلها.
ونحميا ذكر إن الملك وافق لأنه كان مستندا على يد إلهه الصالحة عليه.
يعني هو كان عارف إن ربنا هو اللي بيسهل له الطريق وبيفتح قدامه الأبواب.
ثالثا: نحميا يسافر إلى أورشليم ويقابل المعارضين
نحميا 2 : 9 - 10
بعد موافقة الملك، نحميا اتحرك إلى يهوذا، وكان معاه قواد جيش وفرسان من الملك.
ولما وصل، ظهر شخصين ما كانوش مبسوطين خالص بوجوده.
الأول اسمه سنبلط الحوروني، والتاني طوبيا العبد العموني.
ولما عرفوا إن في شخص جه علشان يهتم بخير بني اسرائيل، اتضايقوا جدا.
وده أول ظهور للمعارضة اللي هتقابل نحميا وهو بيحاول يعيد بناء سور أورشليم.
رابعا: نحميا يتفقد السور في السر
نحميا 2 : 11 - 16
بعد ما وصل نحميا أورشليم، قعد فيها تلاتة أيام.
وبعد كده خرج بالليل ومعاه عدد قليل من الرجال، من غير ما يقول لحد هو ناوي يعمل ايه.
نحميا كان راكب على دابة، وخرج يتفقد السور اللي كان مهدوم وأبواب المدينة اللي اتحرقت.
لف حوالين المدينة بالليل، ومر من عند باب الوادي، وبعدين ناحية عين التنين وباب الزبل، وبعد كده وصل إلى باب العين وبركة الملك.
وكان المكان ضيق لدرجة إن الدابة اللي راكب عليها ما كانش فيه مكان تعدي منه.
فطلع في الوادي بالليل وفضل يتفقد السور، وبعدها رجع من نفس الطريق من باب الوادي.
نحميا كان حريص إنه ما يعلنش خطته لحد في الوقت ده.
حتى المسؤولين والكهنة والنبلاء وباقي الناس ما كانوش عارفين هو خرج ليه ولا راح فين، ولا كان عارفين ربنا حط في قلبه ايه علشان يعمله من أجل أورشليم.
وده بيورينا إن نحميا ما كانش بيتصرف بعشوائية، لكنه كان عايز يشوف الوضع بنفسه ويفهم حجم المشكلة قبل ما يبدأ يتكلم مع الناس.
خامسا: نحميا يشجع الشعب على بناء السور
نحميا 2 : 17 - 18
بعد ما اتفقد السور وشاف حالة المدينة بنفسه، جمع نحميا الناس وقال لهم إنهم شايفين بنفسهم الحالة الصعبة اللي هما فيها.
أورشليم خراب وأبوابها اتحرقت بالنار، وده سبب عار وضعف ليهم.
وبعدها قال لهم تعالوا نبني سور أورشليم علشان ما نفضلش في الحالة دي.
ولفت نظرنا هنا إنه ما قالش لهم انتوا السبب في الخراب أو انتوا اللي قصرتوا، لكنه قال الشر الذي نحن فيه، يعني حط نفسه معاهم واتكلم بصيغة الجمع.
وبعد كده حكى لهم عن يد ربنا الصالحة عليه، وعن كلام الملك اللي وافق يساعده.
فكان رد فعل الناس إنهم تشجعوا وقالوا لنقم ولنبن، وشددوا أيديهم للخير.
يعني كلام نحميا شجعهم وخلاهم مستعدين يبدأوا العمل معاه.
سادسا: مقاومة سنبلط وطوبيا وجشم
نحميا 2 : 19 - 20
لما سنبلط الحوروني وطوبيا العبد العموني وجشم العربي سمعوا إن نحميا والشعب ناويين يبنوا السور، بدأوا يسخروا منهم ويحتقروهم.
وسألوهم انتوا بتعملوا ايه؟ هو انتوا بتتمردوا على الملك؟
كانوا بيحاولوا يخوفوهم ويوقفوا العمل قبل ما يبدأ.
لكن نحميا رد عليهم بثقة وقال لهم إن إله السماء هو اللي هينجحهم، وإنهم عبيد ربنا وهيقوموا ويبنو.
وأكد لهم إن مالهمش نصيب ولا حق ولا ذكر في أورشليم.
يعني نحميا ما سمحش لكلامهم وسخريتهم إنها توقفه، لكنه كان واثق إن ربنا هو صاحب العمل وهو اللي هيسنده.
وبكده ينتهي الإصحاح التاني، ونكون شفنا إزاي نحميا انتقل من الصلاة وطلب المعونة إلى التحرك الفعلي، وإزاي بدأ يشجع الناس رغم وجود معارضة من حواليه.
---
أسئلة شاملة على الإصحاح الثاني من سفر نحميا
اقرأ الإصحاح التاني كويس وحاول تجاوب على كل الأسئلة من خلال الأحداث والتفاصيل الموجودة في الإصحاح.
السؤال الاول: نحميا والملك
١- في أي شهر حصلت الأحداث دي؟ وفي السنة الكام من حكم الملك ارتحشستا؟
٢- إيه كانت وظيفة نحميا عند الملك؟
٣- إيه اللي لاحظه الملك على نحميا وخلاه يسأله عن سبب حالته؟
٤- نحميا رد على الملك وقال له ايه علشان يوضح له سبب حزنه؟
٥- لما الملك سأله انت طالب ايه، نحميا عمل ايه قبل ما يرد عليه؟
٦- إيه الطلب اللي طلبه نحميا من الملك بخصوص أورشليم؟ والملك سأله عن ايه قبل ما يوافق؟
السؤال الثاني: طلبات نحميا ومساعدة الملك
٧- طلب نحميا من الملك خطابات لمين؟ وليه كان محتاج الخطابات دي؟
٨- مين هو آساف؟ وإيه اللي طلبه نحميا منه؟
٩- نحميا كان محتاج الأخشاب دي علشان يستخدمها في ايه؟
١٠- إيه اللي قاله نحميا عن سبب موافقة الملك على طلباته؟
السؤال الثالث: وصول نحميا إلى أورشليم
١١- مين الأشخاص اللي كانوا مع نحميا في رحلته إلى يهوذا؟
١٢- مين هما الشخصين اللي اتضايقوا لما عرفوا إن في حد جه يهتم بخير بني اسرائيل؟
١٣- نحميا قعد في أورشليم كام يوم قبل ما يخرج يتفقد السور؟
١٤- خرج نحميا يتفقد السور في أي وقت؟ ومين كان معاه؟
١٥- ليه نحميا ما أعلنش للناس في البداية عن اللي ربنا حطه في قلبه علشان يعمله؟
السؤال الرابع: جولة نحميا حول السور
١٦- اذكر الأبواب والأماكن اللي مر عليها نحميا وهو بيتفقد السور بالليل بالترتيب.
١٧- إيه اللي حصل لما وصل ناحية باب العين وبركة الملك؟ وليه ما قدرش يكمل بنفس الطريق؟
١٨- من أي باب رجع نحميا بعد ما انتهى من جولته؟
١٩- مين الأشخاص اللي ما كانوش عارفين نحميا خرج ليه ولا راح فين؟
السؤال الخامس: دعوة الشعب لبناء السور
٢٠- نحميا قال للشعب ايه عن حالة أورشليم والسور والأبواب؟
٢١- إيه الطلب اللي طلبه نحميا من الشعب بعد ما وصف لهم الحالة اللي هما فيها؟
٢٢- إزاي نحميا شجع الشعب علشان يبدأوا العمل؟ وإيه الحاجات اللي حكاها لهم؟
٢٣- إيه كان رد فعل الشعب لما سمعوا كلام نحميا؟
السؤال السادس: المعارضة ورد نحميا
٢٤- مين الأشخاص اللي سخروا من نحميا والشعب لما عرفوا إنهم ناويين يبنوا السور؟
٢٥- إيه الاتهام اللي وجهوه لنحميا والشعب؟
٢٦- نحميا رد عليهم بإيه؟ وعلى مين كان معتمد في نجاح العمل؟
٢٧- إيه الكلمات اللي قالها نحميا علشان يوضح لهم إن مالهمش نصيب ولا حق ولا ذكر في أورشليم؟
---
خد وقتك في القراءة وحاول تجاوب من الكتاب المقدس نفسه
ولو مش عارف إجابة سؤال ارجع للعدد واقراه تاني
هدفنا مش بس نخلص إصحاح كل يوم لكن نفهم كلمة ربنا ونتعلم منها ونشجع بعض نكمل ❤️