دراسة سفر نحميا
تلخيص وشرح الإصحاح الاول
مقدمة
في بداية سفر نحميا بنقابل شخصية نحميا، وهنشوف من خلال الإصحاح الاول ازاي خبر واحد وصله عن حالة أورشليم وشعب ربنا كان كفيل انه يغير حالته ويخليه يتحرك ويطلب معونة ربنا.
والإصحاح بيعرفنا على قلب نحميا واهتمامه بشعبه وبيوضح لنا ان بداية اي عمل حقيقي ممكن تكون من الصلاة والرجوع لربنا.
اولا: نحميا بيسأل عن حالة أورشليم وشعبها
نحميا 1 : 1 - 3
بيبدأ الإصحاح بتحديد زمان ومكان الأحداث
نحميا كان موجود في قصر شوشن في شهر كسلو من السنة العشرين
وفي الوقت ده جه حناني واحد من اخوته ومعاه رجال من يهوذا
فسالهم نحميا عن اليهود اللي نجوا وفضلوا من السبي وعن حالة أورشليم
وكانت إجابتهم مؤلمة جدا
قالوا له ان الباقين من السبي هناك في بلاد يهوذا بيعانوا من ضيق كبير وعار وان سور أورشليم مهدوم وأبوابها اتحرقت بالنار
وده معناه ان المدينة كانت في حالة ضعف ومش مجرد ان مبانيها محتاجة ترميم لكن كمان كانت معرضة للخطر ومفيش حماية كافية ليها
وقفة للتامل
نحميا كان بعيد عن أورشليم لكنه ما كانش بعيد بقلبه عن شعبه
كان ممكن يعيش حياته في القصر من غير ما يشغل نفسه باللي بيحصل لبلده وشعبه لكنه اهتم وسال وحب يعرف حالتهم
ثانيا: رد فعل نحميا لما سمع الخبر
نحميا 1 : 4
لما سمع نحميا الكلام ده جلس وبكى وناح اياما وصام وصلى امام إله السماء
لاحظ ان الخبر ما عدش عليه مرور عادي
هو ما اكتفاش انه يحزن لحظة وبعدها يكمل حياته لكنه اتاثر من جواه واستمر في الحزن والصلاة والصوم اياما
وده بيورينا قد ايه كان قلبه متعلق باورشليم وشعب ربنا
واول حاجة عملها بعد ما سمع الخبر انه اتجه لربنا
ما بدأش يخطط لوحده ولا فكر في حلول بشرية قبل ما يطلب معونة ربنا
ثالثا: بداية صلاة نحميا وتمجيده لربنا
نحميا 1 : 5
بدأ نحميا صلاته بتمجيد ربنا وقال
«ايها الرب إله السماء الإله العظيم المخوف الحافظ العهد والرحمة لمحبيه وحافظي وصاياه»
نحميا بدأ الصلاة وهو فاكر مين هو ربنا
ربنا إله السماء العظيم وصاحب السلطان والقدرة وهو كمان الاله الامين اللي بيحفظ عهده ورحمته مع محبيه وحافظي وصاياه
يعني رغم ان نحميا كان قدامه مشكلة كبيرة جدا لكنه بدأ كلامه بتذكير نفسه بعظمة ربنا وامانته
رابعا: اعتراف نحميا بخطايا الشعب
نحميا 1 : 6 - 7
طلب نحميا من ربنا انه يسمع صلاته وينظر الى عبده اللي بيصلي قدامه نهارا وليلا من اجل بني اسرائيل
وبعدها اعترف بخطايا الشعب قدام ربنا
والجميل انه ما اتكلمش عن خطايا الناس بس لكنه قال اخطانا اليك انا وبيت ابي
يعني ما استثناش نفسه من الاعتراف لكنه وقف قدام ربنا بتواضع واعترف بخطيته وخطية شعبه
وقال انهم افسدوا جدا في حق ربنا وما حفظوش الوصايا والفرائض والاحكام اللي وصى بيها موسى عبده
وهنا بنلاحظ ان نحميا ما حاولش يبرر خطايا الشعب ولا ينكر انهم اخطأوا لكنه اعترف بالحقيقة قدام ربنا
خامسا: نحميا يذكر ربنا بوعده
نحميا 1 : 8 - 9
بعد الاعتراف بالخطية رجع نحميا لكلام ربنا ووعوده
فقال له ان يذكر الوصية اللي اوصى بيها موسى
وهي ان الشعب لو خان ربنا وابتعد عنه هيتشتت بين الشعوب
لكن لو رجعوا اليه وحفظوا وصاياه وعملوا بيها حتى لو كانوا متفرقين الى اقصى السماوات فربنا هيجمعهم ويرجعهم الى المكان اللي اختاره ليسكن اسمه فيه
وده كان وعد ربنا لشعبه ان البعد والعصيان مش معناه ان مفيش رجوع
فلو الشعب رجع لربنا من كل قلبه ربنا يقدر يجمعه ويرده
سادسا: نحميا يذكر ربنا بشعبه
نحميا 1 : 10
كمل نحميا صلاته وقال لربنا ان دول هم عبيدك وشعبك اللي فديتهم بقوتك العظيمة ويدك الشديدة
نحميا بيفكر ربنا ان الشعب ده هو شعبه وان ربنا سبق وخلصه وافتداه بقوته
وده مش معناه ان ربنا نسي شعبه لكنه تعبير عن ثقة نحميا في محبة ربنا وامانته وقدرته على الخلاص
سابعا: طلب نحميا الاخير
نحميا 1 : 11
في نهاية الصلاة طلب نحميا من ربنا ان يسمع صلاته وصلاة عبيده اللي بيفرحوا بخوف اسمه
وطلب منه ان ينجح عبده في ذلك اليوم ويعطيه رحمة امام هذا الرجل
والمقصود بهذا الرجل هو الملك اللي كان نحميا بيخدمه
وفي نهاية الإصحاح نعرف ان نحميا كان ساقيا عند الملك
يعني كان عنده مسئولية مهمة في القصر وكان بيقدم للملك الشراب
ومن هنا نفهم ان نحميا كان بيطلب من ربنا انه يفتح قدامه طريق ويساعده في الخطوة اللي كان بيفكر فيها
والإصحاح بينتهي عند النقطة دي من غير ما نعرف لسه ايه اللي هيحصل لما نحميا يقابل الملك
وده اللي هنكمله في الإصحاح التاني
اسئلة تحدي على الإصحاح الاول من سفر نحميا
اقرا الإصحاح الاول كويس وحاول تجاوب على الاسئلة دي من خلال الاحداث والتفاصيل اللي قريتها
السؤال الاول
١- فين كان نحميا موجود وقت الاحداث وفي اي شهر وسنة حصلت القصة؟
٢- مين الاشخاص اللي جم لنحميا من يهوذا؟ وكانوا جايين منين؟
٣- ايه الاسئلة اللي سالها نحميا عن اليهود الباقين من السبي وعن أورشليم؟
٤- ايه الرد اللي سمعه نحميا عن حالة الشعب وحالة المدينة؟ اذكر كل التفاصيل اللي اتقالت له
السؤال الثاني
٥- لما نحميا سمع الخبر كان رد فعله ايه؟ وايه الحاجات اللي عملها بعد ما عرف حالة أورشليم؟
٦- استمرت حالة الحزن والصلاة عند نحميا قد ايه؟
٧- بدأ نحميا صلاته بوصف ربنا بايه؟ وايه الصفات اللي ذكرها عن ربنا؟
السؤال الثالث
٨- طلب نحميا من ربنا ايه في بداية صلاته؟ وكان بيصلي من اجل مين؟
٩- هل نحميا اعترف بخطايا الشعب بس ولا اعترف بخطيته وخطية بيت ابوه كمان؟ وايه اللي قاله في اعترافه؟
١٠- ايه الوصايا اللي اعترف نحميا ان الشعب ما حفظهاش؟
السؤال الرابع
١١- ايه الوعد اللي ذكره نحميا في صلاته عن الشعب لو ابتعدوا عن ربنا؟
١٢- وايه اللي وعد بيه ربنا لو الشعب رجع اليه وحفظ وصاياه حتى لو كانوا متفرقين في ابعد الاماكن؟
١٣- نحميا وصف الشعب قدام ربنا بايه؟ وفكره بايه عن اللي عمله معاهم قبل كده؟
١٤- ايه الطلبات اللي طلبها نحميا من ربنا في نهاية صلاته؟
١٥- مين هو الرجل اللي طلب نحميا ان يجد رحمة في عينيه؟ وايه كانت وظيفة نحميا عنده؟
خد وقتك في القراءة ومتستعجلش في الاجابة
الهدف مش اننا نجاوب على الاسئلة وبس لكن اننا نفهم الاحداث ونتابع مع بعض ازاي ربنا هيقود نحميا في الخطوات اللي جاية
ربنا يبارك وقتنا مع كلمته ❤️