حلول عملية للأطفال المشاغبين
1️⃣ اديله دور قيادي بدل ما يكون مصدر إزعاج
الطفل المشاغب غالبًا شخصية قيادية بطبعها.
اعمل إيه؟
خليه مسؤول توزيع الأدوات
ماسك لوحة الآية
قائد مجموعه
اللي يعدّ النقط
ياخد الغياب
💡 لما يحس إنه مهم… سلوكه بيتعدل جدًا.
2️⃣ “قربي منه بدل ما تنادي عليه”
بدل ما تقولي: "اقعد يا مينا!" قدام الكل 😅
اعملي:
امشي ووقفي جنبه وإنتِ بتشرحي
حطي إيدك بهدوء على كتفه
بصّي له بنظرة حازمة من غير كلام
القرب الجسدي بيهدّي 70% من المواقف.
3️⃣ امدحي أول تصرف صح فورًا
امدحبه حتى لو حاجة بسيطة جدًا.
مثلاً: "عجبني إنك قاعد دلوقتي مركز."
المديح العلني للتصرف الصح بيكرر السلوك.
4️⃣ نظام نقاط أو نجوم
اعملي لوحة فيها أسماء الأطفال.
كل ما يلتزم ياخد نجمة ⭐
وفي الآخر:
امتياز بسيط .. يختار لعبة .. يختار ترنيمة
⚠️ مهم: ما تخصميش قدام الكل بطريقة تحرجه.
5️⃣ قاعدة “10 دقايق حركة”
أطفال ابتدائي مينفعش يقعدوا 30 دقيقة شرح.
قسّمي الدرس: 5 دقايق شرح
نشاط .. سؤال .. حركة.. لعبة صغيرة
الطاقة لما تخرج صح… المشاغبة تقل.
6️⃣ اتفاق خاص بينك وبينه
بعد الفصل كلميه لوحده:
"أنا محتاجة مساعدتك الأسبوع الجاي عشان الفصل يبقى هادي."
خليه يحس إنك واثقة فيه.
7️⃣ استخدمي إشارة ثابتة للهدوء
زي: ✋ ترفعي إيدك أو صقفة معينة أو جملة متفقين عليها وتتدرّبوا عليها. الروتين بيقلل الفوضى.
8️⃣ ما تكسريش شخصيته قدام صحابه
أكبر غلط: التوبيخ قدام الكل.
ده بيخليه: يتمادى أو ينطوي
التوجيه يكون بهدوء وعلى جنب.
9️⃣ لو عنيف أو بيضرب ما تعاقبيش مباشرة.
اعملي: افصليه دقيقة يهدى
اسأليه: "كنت حاسس بإيه؟"
علميه طريقة بديلة (قول – اطلب – استأذن)
إحنا بنعلم مهارة مش بس بنوقف سلوك.
⚠️ أهم نقطة
أطفال المشاغبين غالبًا: أذكياء
عندهم شخصية قوية
محتاجين توجيه مش قمع
لو اتحطوا في الاتجاه الصح… بيبقوا أحسن قادة بعد كده 👏
1️⃣0️⃣ تنويع طريقة الشرح
مشغولين؟ جربي: أسئلة قصيرة
أنشطة جماعية .. قصص قصيرة.. ألعاب تعليمية
التركيز على التجربة العملية يقلل الملل ويقلل المشاغبة.
1️⃣1️⃣ أنشطة حركية قصيرة بين الدروس
مشي سريع، رفع يدين للسماء، صفقة صغيرة للتركيز.
كل 15 دقيقة نشاط بدني قصير يفرغ طاقته.
شخصيات مشاغبين فى الكتاب المقدس
1️⃣بطرس الرسول
كان: مندفع جدًا .. يتكلم قبل ما يفكر
قطع أذن عبد رئيس الكهنة 😅.. أنكر المسيح خوفًا
لكن بعد كده؟ بقى قائد الكنيسة الأولى
وكرز بقوة يوم الخمسين.
🎯 شخصية قوية… اتوجهت صح.
🔥 2️⃣ بولس الرسول
قبل ما يبقى رسول؟ كان بيضطهد المسيحيين
وعنده حدة وشخصية نارية.
لكن بعد ما قابل ربنا؟ بقى أعظم كارز للأمم.
🎯 الطاقة نفسها… بس الاتجاه اتغير.
🔥 3️⃣ يعقوب
في شبابه: خدع أخوه و خدع أبوه
لكن ربنا اشتغل عليه .. وغير اسمه لإسرائيل
وبقى أصل شعب كامل.
🎯 البداية مش النهاية.
🔥 4️⃣ داود النبي
كان: جريء جدًا و اندفاعي
عمل أخطاء كبيرة في حياته لكن قلبه كان متعلق بربنا
وكان يتوب بسرعة.
🎯 الشخصية القوية لما تتوجه صح… تصنع فرق.
"أوعى تكسري الطفل المشاغب يمكن يكون بطرس جديد
أو بولس جديد بس لسه محتاج حد يوجّه ناره."