لكل أب و أم سمعوا جملة " أبنك قليل الأدب " ، محتاج تعرف أن أبنك مش قليل الأدب لكن هو عنده مشكلة و مشكلة حقيقية ليها علاج و اسمها العلمي أضطراب العناد و التحدى أو أضطراب العناد الشارد .
و هنا الأب و الأم و كمان المدرسين بيلاحظوا اشكال كثير من العناد و التحدى .
و اللى ممكن تكون فى شكل :
تحدى سلبى : ذى انه يتأخر فى تنفيذ الاوامر , انه يعملك الحاجة وهو مكشر او ضارب بوز ........ و غيرها كثير .
و ممكن يكون فى شكل :
تحدى ظاهر : وهنا بيكون السلوك واضح برفض تنفيذ الاوامر او الانصياع للقواعد , وممكن يشتم او يحاول يضرب .
و عشان تقول ان ابنك يعانى من اضطراب العناد و التحدى لازم السلوك يتكرر فى أكثر من مكان و مع أكثر من شخص من الكبار ( أب / أم / مدرس / مدرب / .........الخ ) , و ان تستمر الاعراض لمدة 6 شهور على الاقل ومن أعراضه :
- نوبات غضب متكررة مع عدم القدرة على ضبط النفس .
- مجادلة الكبار فى كل شئ و اى شئ .
- رفض الامتثال لطلبات الكبار .
- محاولات متعمدة لازعاج من حوله .
- يلوم الاخرين على اخطائه و افعاله .
- سهل الاستثارة و لأقل الاسباب ( روحه فى مناخيره ) .
- على طول غضبان و مش بيعجبه العجب .
- و ممكن يعمل خطط للانتقام من بعض الاشخاص .
و طبعا كل دا بيأثر على علاقاته الاجتماعية سوء فى الاسرة او المدرسة .
الحل اية ؟؟؟؟؟؟؟؟؟؟؟؟؟؟؟؟؟؟؟
دورك مهم : لو لاحظت الاعراض اللى اتكلمنا عليها دورك هيكون أنك :
1 . اسأل نفسك هل انت ( كأب / أم ) تميل للرفض / الغضب / التحدى لانه ممكن يكون سلوك متعلم منك .
2 . تحاول تبنى علاقة طيبة بينك و بين ابنك او بنتك او حتى الطلاب داخل الفصل .عشان مفيش حاجة بتحصل بين يوم و ليلة اعطى ابنك / بنتك فرصة كى يثق فيك .
3 . ضع قواعد ثابته و فى نفس الوقت مرنه .
4 . لا تعطى أوامر بل هى قواعد فى شكل مهام .
5 . اعطى ابنك او بنتك مهمة واحدة كى يستطيع ان ينجزها دون غضب .
6 . تأكد من ان المهمة او الامر فى استطاعة الطفل .
7 . توقع من ابنك السلوك المرغوب , الانسان بطبيعته بيتصرف حسب توقعاتنا منه .
8 . مكافئة السلوك الايجابي تؤتى ثمار جيدة فى تعديل السلوك .
9 . لا تصرخ فى طفلك عند رفضه فعل ما طلبته منه بل أستمع اليه ربما لديه ما يريد أن يوضح به سبب رفضه .
10 . لا تنسى انك لابد ان تلتزم بالقواعد و انك قدوة لابنك .
11 . راجع طريقتك فى المكافأة و العقاب ربما يكون لها دور فى إستثارة العناد و التحدى .
12 . و الأفضل أن تستشير متخصص فى أقرب وقت عشان يساعدك و يساعد طفلك فى التغلب على الأضطراب و يحدد طريقة علاج مناسبة لشخصية الطفل و شدة الأعراض .