ابني مطلع عيني و تاعبني.
= ليه بس ماله ؟!
مش بيسمع الكلام و مش مرتب و فوضوي و عنيد و بيضرب أخته
=مممم طيب يعني مفيش حاجة حلوة فيه؟؟
حلوة مين.... مفيش مش لاقياله حاجة عدلة 😭😭
للأسف كتير من الأمهات بتركز جداً على كل سلوك خاطئ و تجمعهم و تنتقد كله مع بعض .
أنت مهمل.... أنت فوضوي... عنيد.. عنيف.... مش بتسمع الكلام ليه... نفسي اقولك الكلمة من أول مرة تسمعها
تخيلي معايا كدة... لو زوجك ركز معاكي و طلع كل عيوبك و رصها كدة... اكلك وحش... و ست مهملة.... مبتعرفيش تربي... و نكدية
تفكتري هتحسي بايه؟؟؟
طيب هل هيكون عندك رغبة في تغيير شخصيتك و لا هتحسي بالظلم؟؟
أولادنا حساسين جدا... و الكلام ده بيهد شخصيته و بياخدوا صورة عن نفسهم إنهم فشلة و شخصيتهم وحشة و بيستسلموا للواقع ده
هتلاقي ابنك بيقولك اه أنا رخم... عادي أنا مبحبش النظافة و النظام و هكذا .
كتير من الأمهات متصورة إنها بتوجه... بتعرفه إن سلوكه غير مرغوب ، بس الحقيقة إن التركيز على السلوكيات السلبية بيعززها .
و التركيز على السلوكيات الإيجابية بيعززها و بيحاول دايماً يبقى أفضل❤️
ركزوا على كل الحاجات الجميلة في أولادكم و امدحوها 🌹