ازاي اعلم ابني المسؤولية؟
ياتري إيه أسباب زيادة نسبة الطلاق؟؟؟ 🤔
أكيد فيه أسباب كتير و لكن واحدة من ضمن الأسباب هي عدم تحمل المسؤولية 😒
بنعيش في بيت أهلنا في دلع و هنا... ماما بتعمل كل حاجة لوحدها الأكل و التنظيف و الغسيل و المكواة... و لو فيه إمكانية مادية الأم بتقدر تفوض حد يساعد في أعمال البيت
الأطفال تكبر على الدلع ده و يتجوزوا و الراجل يبقى منتظر زوجته تعمل معاه كده بردو... و هو مش فاهم إيه المشكلة ما مامته كانت بتعمل كده و مبسوطة 😎
و البنت تتفاجئ و تنصدم لأنها مش متعودة على كدة و تقوم المشاكل و يحصل طلاق
طيب نعمل إيه؟؟؟؟؟
لازم نربي أولادنا و نعدهم كويس لحياة مستقلة لأن ببساطة إحنا كمان كأمهات و أباء منعرفش هنعيش معاهم لأمتى 👋
ازاي نربيهم على تحمل المسؤلية؟؟؟
ورقة و قلم و اكتبي و معايا 📝
الأسرة يعني حياة مشتركة بين كل أفرادها
يعني مهام البيت تتقسم على كل افراد الأسرة مش الأم بس .
اقعدوا مع بعض... و اكتبوا قائمة بكل المهام اليومية ( غسيل _ طبخ_ مواعين _مكواك_ترتيب الغرف _ مليء زجاجات المياة _ طي الغسيل و هكذا)
و كل فرد من الأسرة يختار مهمة أو اتنين حسب السن يعملها...
= ازاي ده لسه صغير و مبيعرفش
أيوة طبعاً مش هيعرف من أول مرة و لازم الأم تدربه في الأول و توريه يعمل ايه..... اه هتاخدي وقت و مجهود في تدريبه و لكن هترتاحي بعد كده لما تتشال من عليكي مهام كتير كنتي بتعمليها لوحدك....
من سن سنتين يقدر يشارك بأعمال البيت
* مهم جداً نسيبهم يعتمدوا على نفسهم.... من سن ٩ شهور ياكل لوحده... و بعدها عند سنة و نص سنتين يلبس لوحده...و هكذا
ممكن كمان يحضر فطار لنفسه بسهولة و بالتدريب.... يحضر شنطته لوحده.... شنطة التدريب... شنطة المدرسة أو حتى السفر
* أما الازمات و المشاكل سواء مادية أو ظروف واتغيريت.... ولادنا مهم جداً يعرفوا.. للأسف أغلب الاباء و الأمهات بيخبوا على أولادهم المشاكل والازمات اللي بتمر بيها الأسرة... و بالتالي لما يكبر و يواجه مشاكل و أزمات مش هيقدر يديرها صح زي اللي عنده خبرة من صغره
يبقى لما يكون فيه مشكلة أو أزمة أو حتى مرض أحد افرد الأسرة.... اتكلموا مع أولادكم و اطلبوا منهم المشاركة بحلول و ناقشوا الحلول و امكانية تنفيذيها .
بالشكل ده أولادنا هيطلعوا عندهم خبرة و مهارات 💪