ازاي اعلم ابني انه يحافظ ع جسمه من سن ٣ سنين
هنتكلم عن مرحلة من سن ٣ ل ٥ و هي مرحلة تكوين الشخصية و الأساس اللي هيفضل عليه لحد ما يكبر 💪
ازاي اربي ابني إنه يحافظ على نفسه و غيره و يفهم الحدود ؟
قواعد كده نرسخها فيهم و ثابتة مع كل الناس ما عدا بابا و ماما .
1_ مراقبة الطفل أثناء اللعب مع الأخوات أو الأقارب ( يعني لو أنتِ عندك حد و فيه أطفال أو حتي كبار.. اللعب يكون تحت عينك)
2_ ننبه على الطفل إنه يغطي نفسه كويس و محدش يشوف جسمه و لو حتى أثناء اللعب.. يعني لو هتلعبوا دكتور يبقي دكتور أسنان أحسن... لو حد بيلعب إنه نونه و هيغير البامبرز نقولهم لا .
2_ البنت تتعود تلبس فستان تحته شورت....
= ليه يعنى ٣ سنين صغيرة
= تعود من صغرهم على الحياء و ستر العورات ضروري و مهم جداً
3_ نعلم البنات طريقة الجلوس الصحيحة ( ضم الرجل) البنت الرقيقة الجميلة بتعقد قافلة رجلها.
4_ ممنوع حد يدخل معاهم الحمام سواء بنات أو ولاد ولا حتى في المدرسة و لا الحضانة ( يفضل تدريب الطفل على دخول الحمام لوحده)
5_ مفيش داعي لبيات الأطفال تحت سن ٥ لوحدهم عند أي حد من الأقارب وولا تيته و لا خالتو و لا عمتو .
6_ مفيش داعي يركبوا مع أي حد عربية او باص لا سواق و غيره... حاولي تختاري حضانة أو مدرسة قريبة من البيت و هاتيه و جيبيه بنفسك أرجوكي.
7_ متنتظروش المصايب تحصل عشان نفهم أولادنا... ضروري نعمل تدريب ليهم في اطار لعبة
ماما : فريدة تعملي إيه لو حد قالك انتي عندك كرش وريني
فريدة : هقوله لا معنديش حتى اهه
ماما : لا يا فريدة محدش يشوفك خالص.. مهما كان أي حد يقولك وريني قوليله لا عيب .
و هكذا نفهم بالقصص و بدون مبالغات في التمثيل
9_ نعلمهم ان لما ندخل الحمام لازم نقفل الباب على نفسنا عشان محدش يشوف... طيب مفيش في البيت غير ماما و بابا.. بردو نقفل ( زي ما اتفقنا دي تربية و توعية)
10_ وقت الشاشة محدد و تحت الرقابة... تختاروا كرتون و حملوه علي الموبايل او اللاب و تقفلوا النت... للأسف حالات كتير أولادهم ٣ و ٤ سنين بيشوفوا حاجات علي اليوتيوب بالصدفة و بيكون ليها أثر لحد ما يكبروا
رجاءا الموبايل يكون محدد بوقت و الأفضل النت يكون مقفول... عند تيته و جدو نبهوا مفيش نت... و لو تيته و جدو بيستجيبوا للطفل يبقي بلاش يروحوا لوحدهم عند تيته وجدو
حتي لو هتاخدوا أجازة من الشغل.
11_ شبعوا أولادكم حنان و مدح عشان ميحتاجهاش من برة... و عملوهم إن مفيش حد يحضن و يبوس غير ماما و بابا... خالو و عمو يبوس من الراس بس غير كده لا.
12_ علموهم إن غير مسموح الجلوس على رجل أي حد لا عمو ولا خالو و لا ابن خالتو و لا أي حد... نعقد جنبهم بس
المرحلة دي أهم مرحلة في حياة الطفل.. أي تقصير فيها صعب علاجه
افكركم إن الوقاية خير من العلاج و ان الاحتياط واجب علينا و للأسف كتير حالات بيتم التحرش من الإهل و بيكون الموضوع صادم لدرجة إن محدش يقدر يصدق إن الأهل ممكن يحصل منهم كده... فنحرص افضل
ربنا يحفظ أولادنا جميعاً