تعرف ان التماسيح من الحيوانات اللي نقدر نقول عليها بتاكل الزلط!؟
مش مجازا بحق وحقيقي بياكل زلط بجد في بعض الأوقات وسط وجبته🙈😅
إزاي الكلام ده بيحصل 🤔؟
قبل ما نجاوبكوا خلينا نقول كام معلومة سريعة عن الحيوان الجميل ده 😄👇
كلنا عارفين ان التماسيح من اكبر الزواحف الموجودة في العالم ...
ومش هتتخيلوا ان هي موجوده من أيام الديناصورات. ومن التماسيح المشهورة جدا تماسيح نهر النيل🐊.
اكتشفوا بقى ان التمساح وهو بياكل اوقات بيلتهم احجار صغيره.... ولما دوروا ورا الأسباب ... لقوا ان في اكتر من سبب ممكن يخليهم يعملوا كده
👈اولا بتساعده على تكسير الطعام
👈كمان اوقات بتساعده انه يبقى تحت المياه
👈وممكن تديله احساس بالامتلاء.
طب هو بيتغذى على ايه؟؟
بيتغذى على الأسماك والضفادع والزواحف وبعض الحيوانات الصغيرة.
كمان في بعض الأنواع بتتغذى على انواع أكبر من الحيوانات زي الغزلان مثلا.
طيب ليه لما بنشوف حد بيعيط بدموع واحنا متاكدين ان الدموع دي مش حقيقية بنقول على دموعه دي دموع التماسيح 🐊 ؟
كذا مره يلاحظوا ان التمساح وهو بيلتهم فريسته بينزل دموع من عينه🙄
طبعا هو مش بيعيط على الفريسة ولا حاجه 😅
بس بيقال ان اثناء تناوله للطعام بتدخل كمية كبيرة من الهواء اللي بيثير القناة الدمعية وبيحفزها على إفراز الدموع😥... عشان كده بيبان كأنه بيعيط وهو بياكل.
كمان لما بيفتح فمه جامد اثناء عملية المضغ بيضغط على القناه الدمعية مما يؤدي لنزول الدموع.
🐊طيب تعرفوا ان بالرغم من ان التمساح يبان من الزواحف البطيئة جدا... بس الحقيقة انه عنده القدرة انه يتحرك بسرعة كبيرة على الأرض وفي المياه.
🐊الفكرة بقى انه بالرغم من حجمه وشراسته وسرعته إلا انه برضو ما سلمش من ان بعض الناس بتحاول تصطاده لاسباب كتيره
👈 اولها مثلا انهم بيبيعوا جلده عشان بيتعمل منه شنط واحذية👜👠.
👈كمان البعض بيصطاده عشان يبيع لحمه... لان في بعض الناس مع الأسف بتاكل لحمة التماسيح🥴.
.