24 خطوه لحمايه طفلك من التحرش:
1- اسمح لطفلك يقولك لا ويكون عنده شخصيه .
2- علّمه ان لو مش قابل اى لمسه من حقه يقول لا حتى لو كانت طبطبه على الكتف او على شعره طالما مش قابلها يقول لا ونحترمه.
3- قبل ما تقول لطفلك محدش يلمسك فهّمه ليه متاخدوش على عماه كده مش هيسمعك اصلا ، عشان جسمه غالى وله قيمه وربنا خلقه مميز.
4- فهّم طفلك ان اجزاء جسمه ليها اسم ووظيفه قبل ما تعمل توعيه ضد التحرش مهم تعمل تربيه جنسي
5- عينك على طفلك دايما اعتبر كل الناس معرضين للمرض النفسى متسيبش ابنك فى اى مكان مع اى حد .
6- مينفعش الاطفال تلعب مع بعض فى اوضه بدون مراقبه الاطفال ممكن بدن قصد تتحرش ببعض عشان تكتشف بعض . واى طفل تم التحرش بيه للاسف بنسبه كبيره بيكون متحرش وللاسف برضو اى طفل شاف محتوى اباحى ممكن يطبقه على صاحبه ..مش بخوفكم بس بنقولكم اللى بنسمعه واللى بيجيلنا فى الشكاوى كونو حكمااااء .
7- علّم طفلك لما يشوف الاسانسير فيه شخص واحد ميركبش معاه ويقوله شكرا هركب المره الجايه .وياريت حضرتك تنزل تطلعه بنفسك ومتخليش البوّاب او السواق او اى حد يطلعه .
8- علّم طفل لو اتوبيس المدرسه بقى فاضى وناقص هو وطفل تانى او طفلين يمشو قدام ويقعدو ورا السوّاق .
9- علّم طفلك ياخد حقه واخدان الحق مش بالبلطجه لكن بانك تمنع الغلط يحصل او انك تستعين بحد كبير .
10- علّم طفلك يحكيلك عن كل حاجه بتضايقه وان من حقه يضايق ويعبر عن نفسه .
11- علّم طفلك ان زى ما مش مسموح لحد يشوف جسمه هو مش مسموح له يشوف جسم حد ، حتى لو الشخص ده قاله يعمل كده
يجرى وميسمعش كلامه
زى ما بحافظ حدودى بحافظ على حدود الاخرين حتى لو ما مش محتفظين على حدودهم.
12- متخوفش طفلك وترعبه ، وف نفس الوقت خليه يبقى حكيم ويتعامل بحدود مع الناس وربنا حاطط جوه الطفل منبه داخلى اختبار داخلى للحدود بدليل ان الطفل كتير مش بيقبل يسلّم على الناس واحنا اللى بنكسر حدوده ..سيبوه براحته .
13- علّم طفلك ميقعدش على رجل حد طفلك له حدود وله كيان وله كرسى يقعد عليه .وميتكسف يقول لا شكرا مش بقعد على رجل حد .
14- علّم طفلك ميلزقش ف حد ولا حد يلزق فيه ، ولو فى اى صف يسيب مسافه بينه وبين اللى قدامه .
15- علّم طفلك ان مش كل حد شكله حلو ومعاه حاجه حلوه يبقى كويس ممكن تكون ناس شكلها حلو وريحتها جميله بس للاسف عندهم مرض نفسى يعنى مرض مش بنشوفه وممكن عشان هما تعبانين يكون سبب اذى لينا ف ناخد بالنا .
16- اوعى تكافىء طفلك بحاجه حلوه بصفه مستمره
انت كده بتعلّمه ان اللى يجيبلك حاجه حلوه روحله وانت مغمض
وياما اطفال اتعرضت للتحرش بسبب ان حد اغراها بحاجه حلوه .
17- علّم طفلك ان الحدود تمشى علغريب والقريب اللى تعرفه واللى متعرفوش وان من حقك تقول لا لاى حد وليا انا شخصيا.
18- علّم طفلك لو ماشى فى الشارع ولقى الدنيا هاديه وواحد بس ماشى وراه وبيقرب منه يجرى لاقرب محل او مكان فيه تجمع عان يكون فى امان ، مش خوف لكن حذر وحكمه .
19- علّم طفلك انه ميساعدش حد فى الشارع ، اه للاسف هتعلمه كده ، هتقوله اه ربنا قالنا نساعد الناس وهنساعدهم واحنا سوا او فى امكان نكون ضامنينها وانت معايا بس وانت فى الشارع لوحدك متساعدش حد ولا تسمع لحد ابدا .ولا تقرا لحد حاجه ولا تقف مع حد.
20- علّم طفلك يصرخ ، اه علّمه يصرخ متكتمهوش ، يصرخ فى اى حد بيحاول يأذيه ، يصرخ فى وشك لو بتاذيه انت من حقه .
اومال ليه الاطفال بتتكتم وقت التحرش لانها اتكتمن منك وانت بتزعقلها وبتقولها متزعقيش .
21- علّم طفلك لو حد جاله فى الشارع يعرفه
وقاله تعالى معايا بابا عايزك يقوله لو بابا عايزنى هيتصل بيا ، شكرا بابا قالى انا لما اعوزك هكلمك ومتروحش مع حد ويسيبه ويجرى.
22- علّم طفلك ان مش مسموح لحد يقوله كلام مش مقبول او يقول كلام عن جسمه او يوصف جسمه مش مسموح لاى حد حتى لو قرايبنا او سواق المدرسه .
23- علّم طفلك ان فى ناس بنعرفها فى المجتمع بس ملناش علاقه بيها دول بيساعدونا زى السبّاك او عامل النضافه او الناس فى السوبر ماركت او اصحاب المحلات اللى حوالينا متروحلهمش ابدا لو حد ندهك طالما احنا مش قايلين ليك .
24- من فضلكم كونو قدوه نتعلم فى بيوتنا نقفل باب التويليت علينا عشان ولادنا يعرفو فى المدرسه يقفلو على نفسهم وميسبوش باب التويليت مفتوح .
25- علّم طفلك المزامير احفظ المزامير تحفظ المزامير ودى قلتها فى الاخر لان التوعيه تمشى بطريقه موازيه مع علاقتنا بربنا مينفعش ارمى نفسى فى البحر وانا مش بعرف اعوم واقول ربنا هينجينى .
(الرب نوري وخلاصي، ممن أخاف ؟ الرب حصن حياتي، ممن أرتعب)
مز 27 : 1
ربنا يحمينا ويحمى ولادنا
واخيرا
(إنجيل متى 10: 16)
(هَا أَنَا أُرْسِلُكُمْ كَغَنَمٍ فِي وَسْطِ ذِئَابٍ، فَكُونُوا حُكَمَاءَ كَالْحَيَّاتِ وَبُسَطَاءَ كَالْحَمَامِ)