مسرحية الكنز المخفى

(( يفتح الستار على منزل ريفى يبدو على مظهرة البساطة و الفقر........... و يظهر على 

المسرح رجل كبير فى السن جالس على الأرض و أمامة طبلية عليها طبق و عيش بلدى))

الأب		يا مديحة يا رأفت ………. يالا يا ولاد الأكل هيبرد
رأفت		هو كل يوم فول….. فول ما فيش غير الفول.
مديحة		يا أخى أشكر ربنا أحنا بنلاقى أكل غيرنا كتير بيباتوا من غير عشاء
رأفت		أحنا بنفطر فول و بنتعشى فول وولاد عمى زمانهم بياكلوا أكل أشكال و أصناف عمرنا مشفناها ولا هنشوفها
الأب		ي أبنى أحمد ربنا على كل حال و على كل حاجة و ربنا يتولانا يرعانا
رأفت		ماحدش خلانا فى الحالة اللى أحنا فيها دى غيرك
مديحة		ما تسكت بقى يا رأفت أحنا ها نقعد نتكلم فى الموضوع دا تانى
رأفت		أنا مش هسكت غير لما ناخد حقنا من عمى دا ظالم …… ظالم
الأب		يا أبنى ربنا يسامحة و أنا مسامح فى حقى
رأفت		يا أبويا أحنا لية نسيب حقنا ….. لية يزور فى الورق و يأخذ حقك وأنت تسكت . وولادة عايشين عيشة ملوك بفلوسنا وأحنا عايشين عيشة فقر و حقنا ضايع .
مديحة		يا رأفت كفاية أنت عارف أن أبوك عيان أحنا مش عاوزين نفتح الموضوع دا تانى
الأب		يا أبنى أنا بحمد ربنا و بشكرة و كل أمنيتى من ربنا أنى أشوفك دكتور و أشوف أختك مديحة مهندسة و أشوف محبتكم لبعض و أرتباطكم ببعض و بعدين أموت وأنا مطمن…. وأوعوا الفلوس تفرق بينكم .
رأفت		يا أبويا….. يا أبويا أحنا لازم نرفع قضية على عمى نطلب فيها حقنا و نتهمة بالتزوير
الأب		أسكت …. أسكت متقولش كدة أنا أشتكى أخويا و أقف قدامة فى المحاكم دا حقى و أنا حر فية لما أموت أبقا أعملوا اللى أنتوا عايزينة لكن طول ما أنا عايش مش ممكن أشتكى أخويا
مديحة		بس كفاية كلام فى الموضوع دة أنا رايحة أجيب الشاى
رأفت		أنت ناسى…..ناسى يا أبويا لما رحنا عشان نطلب أيد بنت عمى ناسى قلك أية …….نسيت لما طردنا و قلنا أزاى أناسب ناس فقرة مش من مقامى أن كنت أنت ناسى أنا مش ممكن أنسى
الأب	يا أبنى ربنا محبتة كبيرة و بيسامحنا على كل خطايانا ............وأحنا مش أدرين نسامح على حاجة بسيطة و بنت عمك فى غيرها كتير وربنا يرتبلك الأحسن........أنا عايزك تنسى الموضوع دة وتبص لمستقبلك علشان لما تبقى دكتور سعتها هيندم عمك أنة رفضك ( تدخل مديحة على المسرح حاملة الشاى)
مديحة	الشاى............ أتفضل يا أبويا........أتفضل يا رأفت (يمسك الأب الشاى ثم يحاول الوقوف فيسقط على الأرض)
مديحة / رأفت	(يصرخان)   أبويا............أبويا
الأب	متخافوش يا أولاد......متخافوش..........دى دوخة بسيطة
رأفت	مديحة أنا لازم أجيب دكتور لأبوكى دى مش دوخة خلى بالك منة لحد لما أجيب الدكتور
مديحة	بسرعة يا رأفت
الأب	(يمسك يد رأفت) بلاش بلاش أنا مش تعبان للدرجة دى وبعدين هتجيب فلوس الدكتور منين
رأفت	متخافش و متعولش هم أنا هتصرف (يخرج)
مديحة	متخفش يا أبويا أنت هتعيش عشان خاطرى و خاطر أخويا أحنا ملناش حد غيرك
الأب	ربنا كبير يا بنتى..............وهو ربنا كلنا و يرعاكم أفضل منى........... أنا نفسى أعيش بس لحد لما أشوفك مهندسة كبيرة و أخوكى دكتور كبير .
مديحة	هتعيش.......هتعيش يا أبويا و هنحققلك كل اللى تتمناة ............ بس أرجوك ما تتكلمش دلوقتى عشان متتعبش و تعالى معايا أستريح جوة لحد ما يجى رأفت و الدكتور. (يخرجان من على المسرح ثم يدخل رأفت و الدكتور)
رأفت	يا مديحة.......أتفضل يا دكتور......أتفضل
مديحة	أيوة.........أهلا يا دكتور........أتفضل (ثم تدخل مديحة مع الدكتور ثم تخرج)
رأفت	عمى هو السبب لو أبويا جرالة حاجة أنا مش هسيبة
مديحة	ربنا يستر
رأفت	أية فى أية يا مديحة............فية أية أتكلمى
مديحة	متخفش الدكتور بيكشف علية
رأفت	عمى هو السبب فى مرض أبويا..........وهو السبب فى حالتنا دى وحالتى أنا بالذات
مديحة	ما تزعلش يا رأفت ربنا معانا.............أما بالنسبة لبت عمك فربنا يرزقك ببنت الحلال اللى هو مختارهالك عشان تكون ليك.
رأفت	انتى ناسية انى انا بحبها وهى كمان بتحبنىمن احنا وصغيرين لكن عمك هو السبب هو اللى فرق بينا ربنا يستر على ابويا وانا وعمى والزمن طويل
مديحه	متقولش كده ده برضه عمك وزى ابوك
رأفت	متقوليش زى ابوك......ابوكى مفيش زيه الراجل الطيب المسامح هتساويه بالشيطان اللى بيفرح بأذيه الناس عمك ده شيطان (( يدخل الدكتور على المسرح ))
مديحة	أية الأخبار يا دكتور مجدى
الدكتور	بصراحة أنا مخبيش عليكم
رأفت	أية فية أية يا دكتور .
الدكتور	أبوكم عندة ورم خبيث فى المخ و دى عملية خطيرة جدا ولازم تتعمل بأقصى سرعة لأن أى تأخير فية خطر كبير على حياتة
رأفت	أحنا لازم نعمل العملية بأقصى سرعة
مديحة	و العملية دى تكلف كام
الدكتور	أنا ممكن أخفضلكم السعر لانى أعرف دكاترة زمايلى فى الخارج بيعملوا العملية دى و بنجاح.......يعنى أنا ممكن أخليهالكم فى حدود 50 الف جنية بس لازم تسافروا خلال أسبوع
رأفت	50 ألف جنية ودول هنجيبهم منين
الدكتور	و على فكرة مش ممكن حد يعمل عملية خطيرة ذى دى وبالسعر دة دا غير تكليف المستشفى......ربنا يساعدكم و أنا هحاول أبزل كل جهدى عشان أخفضلكم تانى من التكليف
مديحة	شكرا يا دكتور وأحنا هنتصرف و هنيجى لحضرتك
رأفت	متشكرين يا دكتور((يحاول أعطائة فلوس الكشف))
الدكتور	عيب يا رأفت دا ذى والدى ........... ومتنساش أن أحنا هنبقى زمايل
مديحة	شكرا شكرا يا دكتور على تعبك معانا
الدكتور	لاتعب ولا حاجة ........ بس يا ريت تسرعوا شوية فى عمل العملية و تشوفوا هتسافروا أمتى (( يخرج الدكتور ))
رأفت	((يفكر فى حيرة )) هنجيب الفلوس منين
مديحة	مقدمناش غير أن أحنا نبيع الأرض اللى حليتنا
رأفت	الأرض ..... و الأرض هتجيب أية و أحنا حيلتنا غير قيراطين طين
مديحة	أمال هنعمل أية ...... أحنا لازم نتصرف ((تبكى)) أبويا بيضيع قدام عينينا و أحنا هنقعد سكتين ......أنشاء اللة نبيع البيت اللى حيليتنا
رأفت	(( يفكر قليلا )) مفيش غير حل واحد بس
مديحة	أية هوة قول بسرعة
رأفت	أروح لعمك .......... وأطلب منة فلوس
مديحة	طاب هو هيرضى يديك فلوس ما أنت عارف قلبة قاسى ومها قلتلة مش هيصدقك
رأفت	لازم ...لازم أجيب منة فلوس بأى طريقة دا حقنا أبونا هيموت قدام عينينا ونسكت لأ.....لازم أجيب منة فلوس........ مهما كانت الطريقة أنا لازم أسافر دلوقتى
مديحة	ربنا معاك يا رأفت بس أوعى تتأخر
رأفت	أوعى أبوكى يعرف حاجة............خلى بالك منة
مديحة	متتأخرش يا رأفت
رأفت	خلى بالك من أبوكى ((يخرج رأفت و تبكى مديحة ))

 

 

((يفتح الستار على منزل يبدو علية الثراء و الغنى ثم يدخل شوكت (العم) و هو يتحدث فى الموبايل))

العم	الـــــــــــــــــــــــــــــــــــــــــو
أمين	أزيك يا شوكت بية
العم	أهلا أمين ............... فينك يا راجل برضة دا كلام أستناك حسب المعاد و متجيش لا لا أنا زعلان منك
أمين	أنا أسف يا شوكت بية بس أنا خلاص خلصتلك الحساب كلة و طلعتلك الشيك بالمبلغ اللى أتفقنا علية 5 مليون جنية
العم	بتقول كام ..........
أمين	أية يا شوكت بية مالك مش أحنا أتفقنا على كدة
العم	أيوة صحيح........ على العموم هأخذ الفلوس أمتة
أمين	بكرة أنشاء اللة تكون جهزتلى بقية العقود و أسلمك الفلوس
العم	أتفقنا............. أنشاء اللة أوعدك خلال 3سنين المبلغ هيبقى 50مليون جنية
أمين	يا مسهل البركة فيك أنا متكل عليك
العم	أطمن و أتأكد أن فلوسك بين أيد أمينة يا عم أمين (( يضحك ))
أمين	مع السلامة
العم	مع السلامة (( يضع الموبايل على التربيزة)) ............... أدى الصفقات ولا بلاش يا سلام عليك ياواد يا شوكت طول عمرك تعرف تشغل مخك............. أهو القرشين دول على الفلوس الباقية من الميراث يبقى الواحد كمل 20مليون أرنب و فيها أية لما الواحد يبقى عندة مزرعة أرانب (( يضحك ثم تدخل مريم ))
مريم	صباح الخير يا بابا
شوكت	صباح النور يا مريم يا بنتى
مريم	بابا أنا كنت عاوزة أكلمك فى موضوع كدة
شوكت	أيوة يا بنتى قولى اللى أنت عايزاة......... ها الموضوع أية
مريم	الموضوع بخصوص رأفت أبن عمى
شوكت	رأفت.......أنا مش قولت مش عايز كلام فى الموضوع دة تانى
مريم	بابا أنا أقصد..........(( يقاطعها ))
شوكت	تقدرى تقوليلى رأفت دة يقدر يعيشك منين دا صدمان وعدمان ومحليتهوش اللضة
مريم	يا بابا رأفت هيبقى دكتور
شوكت	دكتور ........... الدكتور دة يقدر يعيشك العيشة اللى أنت عيشاها.......... الدكتور دة يقدر يعيشك فى قصر زى دة
مريم	يا بابا أنت مش فاهمنى
شوكت	أسمعى أنا مش عاوز كلام فى الموضوع دة تانى أنت سامعة و لا لأ ......يلا أدخلى جوة
مريم	يا بابا ......((يقاطعها ))
شوكت	قولت أدخلى جوة (( تخرج مريم ويدخل بولس ))
بولس	صباح الخير يابابا ... اية مالك
شوكت	أختك ياسيدى
بولس	أختى .... مالها يابابا
شوكت	قال اية بتحب رأفت .... رأفت اللى مش لاقى ياكل نفسة
بولس	يابابا سيبك منها انت عارف انها متقدرش تعمل حاجة تزعلك ....... قولى بقى أية أخبار الشغل
شوكت	أما أنا عمات حتة صفقة مع خالك أمين
بولس	صفقة من صفقاتك يا بابا

 

شوكت	طبقا هو أحنى بنعمل غير الصفقات دى .......... طاب دا أنا أتحالف مع الشيطان عشان خاطر الفلوس
بولس	يا باشا ................... يا باشا ......أية الحلوة دى
شوكت	سيبك من الكلام دة وقولى كنت فين و سهران مع مين
بولس	بقولك أية أنا عامل مزاجين كويسين مش عايزهم يضيعوا من دماغى ......... أنا داخل أريح شوية وبعدين هروح الشركة
شوكت	مع السلامة يا أستاذ ......... أنا مش عارف الولد دا طالع لمين زى الشيطان........................  ((يضحك ثم يرن جرس الباب ))...................... يا مريم تعالى أفتحى الباب شوفى مين
مريم	حاضر يا بابا (( تفتح الباب و يدخل رأفت ))
رأفت	عمى.................عمى شوكت أنا كنت جايلك عشان ...........((يقاطعة))
شوكت	أنا قولت لأ يعنى لأ
رأفت	يا عمى أفهمنى بس......(( يقاطعة ))
شوكت	أنت اللى تفهمنى ....... أنا يوم لما أجوز بنتى لا يمكن أفكر فيك أبدا ....... أنت فاهم
رأفت	يا عمى أنا جايلك فى موضوع خطير.......... خطير جدا مسألة حياة أو موت
شوكت	أنتوا كدة ميجيش من ورالكم غير المصايب وبس
رأفت	أبويا .............. أبويا يا عمى تعبان قوى و لازم تتعملة عملية خطيرة جدا وتكاليفها أكتر من 50 الف جنية و أنا جايلك النهاردة عشان متأكد أنك مش هتكسفنى
مريم	معقول عمى تعبان للدرجة دى .......... يا بابا أنت لازم تساعدة ......... لازم تدى رأفت فلوس يا بابا
شوكت	طاب ما تودية المستشفى يعمل العملية زى بقية الناس
رأفت	يا عمى أحنا ملناش حد غيرك نطلب منة فلوس
شوكت	خلاص ..... خلاص خذ ال50 جنية دى وودية للدكتور
رأفت	50جنية .......... يا عمى بقولك العملية تكلفتها أكتر من 50 الف جنية و أنت تقولى خذ الـ50 جنية دى
شوكت	لية هو أنت فاكرنى البنك الأهلى ....... وأنا هجيبلك الـ 50 الف جنية منين يا أخى خلي عندك دم مش عيبك على طولك دة روح شوفلك شغلة بدل ما أنت جاى تشحت منى
رأفت	أنا مش بشحت يا عمى دا حقنا
شوكت	حقكم (( يضحك بسخرية ))  حقكم أية يا ولد
مريم	عشان خاطرى يا بابا أعمل أى حاجة أرجوك أديلة فلوس
شوكت	أنت تخرسى خالص................ أنتى فاهمة
رأفت	أنت مش ممكن تكون عم أنت شيطان .......... أنت ظالم...........ظالم
شوكت	أخرس (( يضرب رأفت بالقلم ))
رأفت	كدة يا عمى ........... معلش ها تمر الأيام و هيجى اليوم اللى هعرف فية أزاى أخذ فية حق أبويا و حقنا و مسيرك هتندم وهيجى اليوم اللى هردلك القلم دة قلمين (( يخرج ))
مريم	(( تجرى نحوة )) رأفت ............. رأفت
شوكت	(( يمسك يد مريم )) تعالى سيبك منة دا مجنون .

 

((يفتح الستار على المنزل الريفى ....... و هو نفس منزل المشهد الأول ))     

 

مديحة	يا ترى أية اللى أخرك يا رأفت ((تتكلم بحيرة فيدخل عليها الأب وهو متألم فيقول ))
الأب	أية مالك يا بنتى أخوكى رأفت فين.
مديحة	((تجرى لكى تسندة )) أية اللى قومك من السرير بس ..... دا غلط عليك .... يا أبويا أنت لازم ترتاح
الأب	(( يتكلم بضيق ))  بقولك أخوكى رأفت فين
مديحة	متشغلش بالك أنت بحاجة ...... رأفت وصل مشوار و زمانة جاى دلوقتى
الأب	لا دى مش حكاية مشوار ....... أنا من أمبارح مشفتهوش..... أنتوا مخبين عليا حاجة يا مديحة
مديحة	لا أبدا يا أبويا ....... ما فيش حاجة
الأب	مديحة أنت بنتى و أنا عارفك مبتعرفيش تكدبى ........ رأفت راح فين
مديحة	(( تتكلم و هى  مترددة ))  بصراحة يا أبويا ........ رأفت راح  (( واثناء ذلك يدخل رأفت وهو سرحان )) ...... أهو جة يا أبويا مش قولتلك زمانة جاى
الأب	مالك يا رأفت يا أبنى ....... أنت كنت فين .......... مالك مهموم كدة لية
رأفت	مفيش حاجة يا أبويا ....... ما فيش بعدين هبقى أحكيلكم
الأب	لا ...... أنت مش زى عوايدك يا رأفت أية مالك
رأفت	(( يفكر قليلا )) ........ ألا ........ صحيح يا أبويا السؤال اللى قالة بطرس للسيد المسيح عن مسامحة الأخ لأخواتة أكتر من مرة كان سببة الزعل ....... أو الغلطة اللى غلطها أخواتة كانت أية...............
الأب	ربنا محددش فى المثل لكن قال سامح أخيك ليس سبع مرات بل سبعين مرة سبع مرات يعنى تسامح أخوك 490 مرة فى اليوم
رأفت	يعنى حتى لو كان أخويا دة واكل حقى ........ أسامحة بردة
الأب	ربنا محبتة كبيرة عشان كدة لو كنت كملت المثال كنت هتفهم قد أية المفروض نحب و نسامح بعضنا
مديحة	مش المثل دة بتاع المديون اللى سامح العبد اللى كان شغال عندة
رأفت	أيوة يا مديحة المثل دة بيحكى أن فى ملك كان عاوز يحاسب عبيدة وقدمولة واحد مديون بعشرة ألف وزنة  و مكنش معاة اللى يوفى الدين ........ فأمر سيدة أن يباع هو و أولادة وكل مالة حتى يوفى الدين (( يقاطعة الأب ))
الأب	لكن العبد سجد لسيدة و قالة أتمهل عليا لغاية لما أوفى الدين وسيدة أتحنن علية وسابة وتركلة الدين ........... والملك دة بيشير للسيد المسيح اللى سامحنا على الصليب و بموتة و غفرانة لينا من خطايانا و محسبناش عليها
رأفت	لكن العبد كان وحش شيطان
الأب	فى ناس كتير بتعمل كدة ناس بتسمحها على أخطاء كبيرة ........ لكن هى مبتسامحش على حاجات صغيرة و الدليل على كدة لما طلع العبد من عند سيدة لقى عبد من العبيد اللى معاة مديون لة بــــــــــ100ــــــــــمئة دينار فمسكة و قالة لازم توفى الدين اللى عليك .........و العبد سجدعند رجلية وقالة تمهل عليا لحد لما أوفيك دينى .......... لكن هو مرضيش يسامحة ولا حتى يستنة علية فراح قبض علية ورماة فى السجن

 

مديحة	العبد الشرير.... الملك سامحة على دين كبير و هو ما سمحش على على دين صغير
الأب	عشان كدة لازم نكون مسامحين بعضنا لبعض وألا كل الدنيا هتبقى ملهاش لزمة ......... عارف لية يا رأفت لأن يبقى أزاى مسامحش على الخطأ و أحنا بنصلى و بنقول أغفر لنا زنوبنا كما نغفر نحن أيضا للمذنبين ألينا ....... و كمان ربنا بيقول أن لم تغفروا للناس فلن يغفر لكم أبوكم السماوى زلاتكم
رأفت	برضة مجاوبتنيش على سؤالى لو أخويا واكل حقى برضة أسامحة
الأب	حتى لو كان واكل حقك تسامحة وربنا بيقدم لنا أروع مثل فى شخصية أبنة يسوع المسيح اللى هو الديان العادل اللى لينا عندة حقوق و ديون لكن جة عشان يقولنا أنا مسامحكم و هسدد ديونكم ورغم كدة يا ريت قبلنا محبتة وغفرانة لينا بل بالعكس أهناة و لطمناة و ضربناة وخلناة عار وسطينا وكنا بنطردة كل ما بيجينا و مكفناش كدة لكن صلبناة وأستهزئنا بية و عملنا كل اللى ممكن تتخيلة من خطايا ومازلنا بنعمل كل يوم وبنغلط فى حقة كتير ............ و كل حاجة و أبسط حاجة هو جسدنا دة لكن للأسف بنستخدمة فى حاجات هو مش عاوزها ومع ذلك هو غفر للصلبوة على الصليب .......... يا ريت نتعلم منة لأن الكتاب المقدس بيقول :                                   ++ ينبغى أن نسلك كما سلك المسيح ++   عشان كدة لازم تسامح أخوك على كل حاجة حتى لو كان واكل حقك
رأفت	أنت بتقول أمثال ........ يا أبويا
مديحة	مالك يا رأفت أية اللى جرالك
الأب	المهم يا رأفت أنت ماقولتليش أنت كنت فين
رأفت	((  يفكر فى حيرة )) ......... أقولة ولا.... لأ...... ما أنا لو مقلتلهوش هيعرف ...أنا فى حيرة يا ناس .....أنا هقولة ....... أنا يا أبويا رحت عند عمى شوكت بية عشان أطلب منة فلوس
الأب	لية يا أبنى مش أنا قولتلك متعملش كدة و بعدين ما أحنا مستورين والحمد للة ومش محتاجين فلوس لية تعمل كدة ياأبنى
مديحة	لأننا يا أبويا محتاجين
رأفت	أيوة يا أبويا أنت عندك ورم فى المخ و لازم تعمل عملية بــ50 ألف جنية ........ عرفت أنا لية رحت يا أبويا
مديحة	أيو يا أبويا ولازم تعمل العملية بأسرع وقت .......((تنظر لرأفت و تقول لة )) ..... هو عمك أداك فلوس
رأفت	متقوليش عمك دا شيطان ....... شيطان
مديحة	يعنى مرضيش يديك الفلوس
رأفت	مش بس كدة ....... دا كمان طردنى من بيتة وضربنى
الأب	كفاية ................. أسكت ................... كفاية
رأفت	لأ .... أنا لازم أرفع قضية على عمى دا حقنا .......... حقنا يا ناس
الأب	يا أبنى حرام عليك أنت لية فى قلبك الكراهية دى لعمك
رأفت	قولتلك دا مش عمى دا شيطان ......... شيطان
الأب	أسكت ....... أسكت ....... آة ....... آة........(( يسقط على الأرض ))
رأفت ، مديحة	أبويا ........... أبويا
الأب	بلاش ......بلاش يا أبنى تقف قدام عمك بلاش
رأفت	حاضر يا أبويا ...... بس أرجوك بلاش تتكلم لحد لما أجيب الدكتور
الأب	ملهوش داعى ...... بس أوعدنى أنك مش هتقف قدام عمك فى المحاكم

رأفت	هو عدك يا أبويا ........ بس بلاش تتكلم كتير
الأب	كان نفسى أعيش لغاية لما أشوفك دكتور و أشوف أختك مديحة مهندسة .
مديحة	هتعيش ......... هتعيش يا أبويا .... هتعيش
الأب	أوعدونى أكم تجاهدوا لحد ما تحققوا أمنيتى
رأفت	نوعدك يا أبويا ......... خالى بالك من أبوكى لحد ما أجيبلة الدكتور
الأب	بلاش ....... آخر حاجة هقولهالكم أنكم تحبوا بعض و أوعوا حاجة تفرق بينكم ....... مهما كانت وخلوا صورة المسيح قدامكم دايما وربنا يتولاكم ويرعاكم ................................... (( يحنى رأسة ويموت ))..........................................................................
رأفت , مديحة	(( يصرخان ويبكيان بمرارة )) ......... أبويا ......... أبويا

 

((يفتح الستار على منزل العم الغنى و تظهر على المسرح مريم وهى تصلى ))

مريم	يا رب أشكرك لأنك جيت لينا و مت علشانا ............ يارب أشكرك لأنك أنت كل شى فى حياتى .......... يا رب أشكرك لأجل الظروف اللى أحنا بنمر بيها ........... يا رب أنا بطلب منك أنك تلمس بابا بلمسة شفاء ......... من فضلك يا رب أذا كنت سمحت لبابا بالمرض فيارب أسمح أن المرض يوصلة لطريقك وللحياة الأبدية .......... يارب بابا مش محتاج لشفاء الجسد بس ...... لكن محتاج لشفاءة من مرض الخطية ............ وأنا بطلب منك يا رب أنك تضع موضوع أخويا بولس فى أيدك أرجوك يارب أدخل فية و حلة أنت وخلية يبقى شاب كويس ومتخلهوش يذهب وراء شهوات العالم بشفاعة والدتك القديسة الطاهرة مريم وجميع الشهداء و القديسين ......... لأن لك القوة و المجد الى الأبد ....... آمين . (( يدخل الأب " شوكت" ))
شوكت	(( يتكلم وهو متعكر المزاج )) ......... يا مريم ........ يامريم.
مريم	(( تجر بسرعة نحوة )) ........ خير يا بابا أية اللى قومك من السرير
شوكت	يعنى أنا هفضل طول عمرى نايم فى السرير يا بنتى ....... أنا تعبت ...... كفاية مش قادر أقعد فى السرير أكتر من كدة
مريم	يا بابا لكن الدكتور قال أن الحركة الكتيرة مش كويسة على صحتك أنت لازم ترتاح يا بابا
شوكت	يا بنتى أنا مش قادر أقعد فى البيت كدة زى الستات أنا لازم أروح الشركة و أشتغل ..... دا كل يوم أنا بقعدة فى البيت بيقع عليا بخسارة
مريم	يا بابا كفاية ما أنت ياما أشتغلت لازم ترتاح ........ أنت ياما تعبت جة الوقت اللى ترتاح فية ........ و بعدين البركة فى بولس أخويا يمسك هو الشركة
شوكت	بولس هو فين بولس دة ......... دا من يوم ماعييت وهو ماجاش ولا حتى سأل عليا
مريم	معلش يا بابا يمكن يكون مشغول فى الشركة .......... ماتشغلش بالك أنت المهم أنك ترتاح
شوكت	يامريم يا بنتى أنا بأخذ العلاج اللى كتبهولى الدكتور وعملت كل الأشعة و التحاليل الطبية اللى طلبها يبقى كفاية كدة و أنا دلوقتى أحسن من الأول
مريم	بس يا بابا كل ما أرتحت أكتر كل ما هتخف بسرعة ........ الدكتور بيقول كدة
شوكت	طايب ما الدكتور بيجى كل يومين يشوفنى ويسأل عليا ودا كفاية
مريم	على العموم أنشاء اللة يا بابا هتبقى كويس و تخف و ترجع أحسن من الأول (( يطرق الباب ))
شوكت	شوفى مين بيخبط يا بنتى
مريم	حاضر يا بابا
الموظف  ( أيمن )	شوكت باشا موجود
مريم	أيوة أقولة مين
الموظف	قوليلة المهندس أيمن ....... الموظف عندة فى الشركة
شوكت	أهلا يا أيمن ......... تعالى خش
الموظف	أهلا .... أهلا سعادة الباشا ......... أزيك يا باشا وأزى صحتك
شوكت	أنا كويس ....... أزيكم أنتوا وأزى حال الشركة قولوليى عملين أية وفين بولس
الموظف	المهم صحتك أنت يا باشا
شوكت	سيبك من صحتى ........ فين بولس
الموظف	بصراحة يا باشا ........ بولس بية بقالة 15 يوم مبيجيش الشركة
شوكت	(( بغضب و نرفزة )) ....... طايب يا بولس ........ قولى يا أيمن أية أخبار المبنى الجديد و طلبيات الخشب عملتم أية فى التشطيبات وبقية الشغل
الموظف	الموضوع بصراحة
شوكت	أتكلم يا أيمن
الموظف	الأخبار ما تطمنش
شوكت	أنت بتقول أية .......... أتكلم
الموظف	بصراحة من يوم ما سعادتك تعبت وبولس بية مابيجيش الشغل مش ماشى كويس ...... طلبية الخشب ما وصلتش و كدة هيبقى علينا غرامات كتيرة لأننا أتأخرنا فى التسليم حسب الميعاد
شوكت	برضة كدة .......... مغفلين
الموظف	طاب أستأذن أنا يا سعادة الباشا
شوكت	أتفضل يا أيمن ((يخرج أيمن )) ........... مش عارفين يتصرفوا من غيرى ..... بقى أغيب شوية عن الشركة كل حاجة تبوظ وكل الشغل يتعطل ........ أدى اللى كنت عامل حسابة
مريم	هدى نفسك يا بابا مش كدة .......... هدى أعصابك بلاش نرفزة
شوكت	ما أنتيش سامعة .......... أعمل أية .......... أنا لازم أنزل حالا (( يحاول أن يتحرك ليلبس ولكن بعد الحركة يصرخ )) ..... آة ..... آة ..... مش قادر الحقينى يا بنتى
مريم	(( تصرخ )) ....... بابا ....... بابا (( تجرى لتسندة ))
شوكت	شفتى ........ شفتى أخوكى عمل أية فى الشركة (( يرن جرس الباب ثم يدخل بولس )) ........ كنت فين يا ولد
مريم	هدى نفسك يا بابا
بولس	(( بسرحان و توهان )) ....... أنا كنت معاها بس هي لية عملت فيا كدة ..... دا أنا بحبها لية عملت كدة لية
مريم	مين دى يا بولس وعملت أية
بولس	(( يكلم نفسة )) ..... أنا قولت هى ..... أنا قولت عملت حاجة ........ أنا خترفت ولا أية
شوكت	أنت سكران يا ولد
بولس	لا يا بابا ........ أصل أنا مخدتش المزاج بتاع النهاردة
شوكت	مزاج ...... مزاج أية ياولد ....... لأ أنتم عايزين تموتونى ....... أيوة عايزين تورثونى بالحية لكن لأ أنا هربيكم ....... أيوة هربيكم (( يخرج شوكت و مريم تسندة ........ و يبقى بولس بمفردة على المسرح ويحاول أبجاد التذكرة التى يريد أن يشمها  ثم يجدها بعد عناء فى البحث و يشمها ثم تدخل مريم ))
مريم	طبعا دلوقتى مبسوط وفايق مش أخذت الهباب اللى بتشمة
بولس	وأنت مالك
مريم	ياأبنى طاب حرام عليك صحتك
بولس	يعنى الفلوس اللى عندنا دى هنوديها فين ........ مش لازم نصرفها ونتبسط بيها
مريم	يا بولس أبوك تعبان وأنت بعمايلك دى بتتعبة أكتر
بولس	وأية يعنى ماهو معاة فلوس كتير وهيعمل العملية وهيخف وهيبقى كويس (( يرن جرس الباب ))  ......... طاب روحى شوفى مين (( تذهب مريم لتفتح الباب و يدخل الدكتور ))
الدكتور	مساء الخير
مريم	مساء الخير يا دكتور ......... كويس أن حضرتك جيت دلوقتى دا بابا تعبان شوية
الدكتور	أنا مش هقدر أخبى عليكم أكتر من كدة ........ بصراحة التحاليل و الأشعة كانت نتيجتها خطيرة جدا .......... مرض الباشا يلزمة عملية فى أسرع وقت
مريم	مرض ....... مرض  أية يا دكتور
الدكتور	أبوكم عندة ورم خبيث فى المخ
مريم	مرض خبيث فى المخ (( يدخل شوكت ))
شوكت	أية يا دكتور ....... أنا عندى ورم خبيث فى المخ
الدكتور	أهدى ...... أهدى يا شوكت بية العملية سهلة
شوكت	لأ ........ أنت بتضحك عليا يا دكتور أنا مش مصدق
الدكتور	متخافش .......... بس أنت لازم تعمل العملية بأسرع وقت ممكن
مريم	وفية دكتور بيعمل عمليات خطيرة زى دى فى مصر
الدكتور	أيوة فية ....... بس نسبة النجاح فيها 10% ...... بس فية دكتور واحد متخصص فى العملية دى وواخد الدكتوراة فيها من برة وبيعملها بنسبة نجاح توصل 100%
شوكت	دا فين دة
الدكتور	هو رجع مصر من شهرين بس .......... بس تكاليفة عالية جدا فى العملية
مريم	كام يعنى يا دكتور
الدكتور	حوالى 250 ألف جنية
شوكت	أنشاء الله يأخذ مليون جنية حتى ............ وهو أسمة أية الدكتور دة
الدكتور	اسمة ............. رأفت حنا بولس ...........
بولس	رأفت أبن عمى بقى دكتور كبير كدا ............ مالله عال دا الحال أتشقلب يا جدعان
شوكت	وأنا هعمل العملية أمتى يا دكتور
الدكتور	أنا هقابل الدكتور رأفت النهاردة وهخلية يجى يزورك ويتفق على العملية معاك ....... وبالمرة يكشف عليك
مريم	شكرا يا دكتور ............ هنتعبك معانا
الدكتور	لا العفو ....... الف سلامة لبابا
بولس	مع السلامة يا دكتور .......... الف سلامة (( يقوم بولس بتوصيلة الى الخارج ثم يقبلة))
شوكت	معقول رأفت أبن المرحوم أخويا بقى دكتور كبير بالشكل دة ............. ياة
مريم	ولية لأ ............ أنا مبسوطة أن  ربنا  وقف جنبة لحد ما وصل للستوى دة
شوكت	يوصل للمستوى دة ............ طاب أزاى ............ أزاى وهو مش لاقى يأكل ......... يبقى دكتور كبير كدة وأخوكى بولس اللى عندة كل حاجة يبقى وأخدلى بكالريوس زراعة بالعافية وقعد فيها سنين لولا الفلوس و الوسايط
بولس	هتدوش دماغى لية وتضيع المزاج يا رأفت ......... ما أنت فى حالك ........ و أحنا فى حالنا
شوكت	بتقول أية يا بولس بية
بولس	لا أبدا يا بابا ........ بقول ما لأنت كنت عارف أنى كنت هدخل كلية الطب بس فرقت معايا على حاجة بسيطة كدة يجى 20% بس
شوكت	سيبك من الكلام دة اللى مبيجبش مصلحة و قولى أنت كنت فين الوقت اللى فات
بولس	(( بغيظ )) .......... كنت مسافر و بلاش تحكى معايا فى الموضوع دا تانى عشان مش عاوز أفتكر منة حاجة
شوكت	أدى اللى أنت فالح فية ........... أدى اللى واخدة منك لا فالح فى دراسة ولا فى شغل
مريم	يا بابا من فضلك هدى نفسك خالى بالك من صحتك دلوقتى وسيبك من كل حاجة أنت أهم (( يرن جرس الباب ))
شوكت	روحى شوفى مين (( تذهب لتفتح الباب ثم يدخل الأب الكاهن ))
أبونا	سلام يا مريم ........ أزيك يا بنتى
مريم	سلام يا قدس أبونا ......... أتفضل
أبونا	أزى حالكم ......... مش صحت بابا أحسن دلوقت
مريم	نشكر ربنا يا أبونا  ......... بس
أبونا	أية فية أية يا بنتى
مريم	أبدا الدكتور بيقول أن بابا لازم يعمل عملية والعملية دى خطيرة جدا
أبونا	للدرجة دى العملية خطيرة
مريم	دا مش بس كدة ........... لكن كمان النوع دة من العمليات صعب ومحتاج لدكتور كبير ومتخصص ويمكن نضطر للسفر برة عشان نعمل العملية
أبونا	ربنا يدخل ......... ياة قد أية الكلام دة صعب قد أية الواحد بيحزن لما بيسمع عن أمراض و عمليات يصعب للطب و العلاج على شفاها لكن فى نفس الوقت ده بيأكد ان لازم تفضل مقاليد الامور ومفاتيحها بين يدين ربنا وحده
شوكت	لكن الدكتور قال ان العمليه مش مستحيله وبعدين قال ان ابن اخويا رأفت ممكن يعمل العمليه دى اصله عملها كتير ونجحت
ابونا	على العموم انا سعيد جدا علشان حضرتك لقيت حل المشكله وعرفت أن العمليه ممكن تتعمل .....لككن عارف حضرتك ممكن عمليه زى دى قليل ما تلاقى اللى بيعملها ويمكن ناس كتير بتسافر لبلاد بعيده علشان تلاقى دكتور يحل مشاكلهم ويعالجها وتدفع فلوس كتيره جدا وتتعب فى النهايه وللاسف ماتلاقيش علاج ليها
بولس	انا مش فاهم انت عايز تقول ايه .....اللى دخل موضوع بابا فى اللى بتقوله احنا مستعدين ندفع مليون جنيه فى العمليه
ابونا	انا عايز اقول من الكلام ده ان الناس بتتعب وبتدفع فلوس وعندها استعداد تسافر علشان علاج جزء من جسدهم مهما كلفهم الثمن
شوكت	طبعا لازم كل واحد يعمل كل ما فى وسعه لان المرض متعب ومحدش يقدر عليه
أبونا	عارف الكتاب بيقول ايه ....... ++ ان كان فى واحده نازفه دم لمده 12سنه وتالمت كثيرا وانفقت كل معيشتها ولم تنفع شيئا بل صارت فى حال اردأ++
مريم	قصدك ايه يا قدس ابونا
أبونا	قصدى ان ياما فى ناس بيبقى كل همهم انهم يعالجوا امراضهم الجسديه ......المرض اللى باين قدام عنيهم وناسيين ان فى مرض اكبر بكتير بيسرى فى كل جسدهم
شوكت	(( يتكلم بعجرفه)) ........... قصدك ايه مش فاهم
أبونا	فى مرض أخطر و أبشع من مرضك الجسدى مرض طرح كثيرين جرحى وقتلة أقوياء المرض اللى نتيجتة الأكيدة هى الموت المرض اللى بيملا  كل أنسان فى كل مكان وفى كل العالم المرض اللى مش ممكن يعالجة أى طبيب ولا عالم ولا فيلسوف المرض اللى دخل كل بيت وكل عيادة وحتى كل مستشفى المرض اللى مفيش غير طريقة علاج واحدة هى اللى تشفية هى التوبة و الأعتراف والتناول من جسد ودم المسيح .............. الصلاة والصوم وعمل الخير واللى يعالج المرض دة هو شخص واحد هو المسيح والكلام اللى أنا قلتة اللى هو التوبة و الأعتراف والتناولوالصلاه والصوم وعمل الخير هى الروشته الوحيده فى العالم كله
بولس	انت بتتكلم ازاى ايه دخل الروشته فى التوبه والاعتراف والتناول والكلام اللى انت قلته ده بمرض بابا اللى انت بتقوله ده مالهوش صله اساسا بموضوع بابا
شوكت	الموضوع دا أنا ميهمنيش أنا المهم عندى أن أعمل العملية
أبونا	لا يهمك الموضوع دة ويهم كل واحد فينا لأن الكتاب بيقول ++ أنما بأنسان واحد دخلت الخطية الى العالم وبالخطية الموت وهكذا أجتاز الموت الى جميع الناس أذا أخطأ الجميع ++ ................. صدقنى مشكلة مرض الخطية أهم من مرضك الجسدى .... ربنا يتدخل ويشفيك
شوكت	على العموم أنا مش هقدر أقعد معاك أكتر من كدة لأن الدكتور نصحنى بالراحة
أبونا	أنا متأسف أنى تقلت عليكم لكن يا ريت تفكروا فى الكلام دة (( ثم ينظر لبولس )) ............... وربنا يمد أيدة بلمسة شفاء ليك يا أبو بولس أنا ماشى دلوقتى وربنا معاكم
مريم	أتفضل يا أبونا .......... مع السلامة (( وبعد أن يخرج أبونا تقول )) .......... أنا دخلة أستريح جوة يا بابا (( تخرج مريم و ينظر الى بولس ويقول لة ))

 

 

شوكت	وأنت ياأستاذ مش بتروح الشركة لية
بولس	سيبنى فى حالى دلوقتى أنا مش فاضيلك ...... انا ورايا مشوار مهم ولازم اروحه (( يبدو علية الصداع وحالة الأدمان ))
شوكت	مالك يا ولد أنت أزاى تكلمنى بالطريقة دى
بولس	بقولك أية أنا خلصت الفلوس اللى معايا وعايز فلوس تانى
شوكت	خلصت الفلوس دا أنت بتأخذ 15 الفجنية فى الشهر ......... بتوديهم فين
بولس	بقولك أية أنا مش فايق للكلام دة دلوقتى أدينى الفوس و خلصنى
شوكت	مالك يا ولد أنت مش طبيعى أنت شارب حاجة
بولس	أيوة شارب ......... أنا مدمن هيروين أرتحت ........ ريحنى بقى وأدينى الفلوس
شوكت	مدمن ............. مش كفاية مستحمل أستهتارك كمان عايز تضيع سمعتى فى السوق ......... لأ........ أنا أستحملتك كتير لكن مش هسمح لفاشل زيك أنة يضيع تعب السنين
بولس	تعب السنين .......... تعب السنين ولا سرقة السنين و مص دم الغلابة
شوكت	أخرس .......... (( يضربة بالقلم ولكن بولس يمسك يدة ))
بولس	جة الوقت اللى هتكلم فية وأنت تسمع ........ أذا كان حد فينا هو السبب يبقى أنت
شوكت	أأأأأأأأأنـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــا
بولس	أيوة أنت ...... أنت اللى ضيعت مستقبلى ....... أنت عمرك ما سألتنى أنت فين ومع مين كل اللى عليك تدينى الفلوس وبس ...... أنت فاكر دا كفاية
شوكت	أنا مقصرتش معاك أنت اللى فاشل
بولس	كفاية بقى وأظهر على حقيقتك ......... أذا كان حد فينا فاشل فهو أنت
شوكت	أنت بتقول أية يا ولد (( ويمسك برأسة موضحا علامة الصداع و الألم ))
بولس	أيوة أنت فاكرنى مش عارف حاجة عنك ولا فاكرنى أقتنعت أنك متعرفش أنى مدمن ........ لا تعرف وعشان كدة حطيت تحت أيدى كل أسرار الشركة ........ فاكر كلامك زمان ........ اللى تغلبة العبة ........ ونفذتها حتى مع أخوك ....... لكن أنا دلوقتى معايا كل أسرار الشركة وهخليك تتحايل عليا عشان تدينى الفلوس (( يخرج و هو يضحك ))
شوكت	لا لا......كفاية......كفاية (( تدخل مريم وهى تصرخ ثم يسقط الأب على الأرض ))

 

 

(( في نفس منزل العم (شوكت) ويكون جالس و هو يتألم من المرض)) 

شوكت	يا مريم ......... يا مريم
مريم	حاضر يا بابا فى حاجة
شوكت	هو الدكتور مش قال أنة أتفق مع أبن عمك على أنة هيجى النهاردة عشان يتفق معايا على العملية
مريم	أيوه أتصل من شوية وقال كدة يا بابا
الأب	أمال رأفت أبن عمك أتأخر لية معقولة مش هيجى
مريم	لا يا بابا هو متأخرش بس أنت اللى قلقان ومستعجل
شوكت	أصل نفسى أخلص من الموضوع دة وأشوف حالى وشغلى المتعطل
مريم	تانى يا بابا هنتكلم فى الشغل
شوكت	تانى و تالت و عاشر دا أهم حاجة فى حياتى ............ هو الزفت بولس مجاش
مريم	لا يا بابا ........ بس متشغلش بالك أنا رحت لأبونا أنطونيوس وهو وعدنى أنة هيدور علي بولس ولما يتلاقية هيجيبة لحد هنا
شوكت	أبونا أنطونيوس ....... أهو الراجل دة مش بينزلى من ظور ...... مش ببلعة
مريم	لية بس كدة يا بابا ........ بلاش تقول على أبونا أنطونيوس كدة
شوكت	ما أنت عاملة نفسك قديسة ......... سيبك من الكلام دة ......... أية رأيك لو كلمتلك رأفت  أبن عمك فى الجواز أنا عارف ومتأكد أنة لسة بيحبك وهو على الأقل مش هيأخذ مننا فلوس العملية
مريم	(( تكلمة بغيظ )) .......... بابا أنا الموضوع دة مبفكرش فية وأنتهى بالنسبة لى من زمان وأنشاء الله لما تعمل العملية وتخف بالسلامة ويرجع بولس ......... أنا هسافر الديرعشان أترهبن أنا خلاص كرست حياتى للى يستحقها ........ (( يرن جرس الباب وتذهب مريم لتفتح الباب ثم يدخل رأفت ويبدو علية مظاهر الغنى ...... والغرور يملأ نظراتة وحركاتة ))
مريم	رأفت أبن عمى أهلا وسهلا
رأفت	قصدك الدكتور رأفت ....... أنا جاى أشوف العيان اللى قالى علية الدكتور مجدى
مريم	أتفضل يا دكتور
شوكت	روحى يامريم أعملى حاجة ساقعة لرأفت ......... أهلا يا رأفت يا أبن أخويا أخيرا شفتك دكتور كبير قد الدنيا ....... أتفضل يا أبنى
رأفت	ياريت تدخل فى الموضوع على طول
شوكت	طيب يا أبنى لما نقعد ونعمل معاك الواجب
رأفت	متقولش ابنى تانى انا مش ابنك ومش ممكن اكون ابنك ...... انا ابن حنا الراجل الغلبان اللى ضحكت عليه واخدت كل فلوسه
شوكت	يا رأفت يا ابنى
رأفت	قلتلك متقولش ابنى ومتنطقهاش تانى على لسانك انت عمرك ماعرفت معنى الابوه ولا كنت لى عم انت عمرك ماحسيت بالجوع ولانمت فى يوم بردان من قله الهدوم والغطاْء انت عمرك ما عرفت الشقاء ولا التعب
شوكت	يا رأفت انا عايز اقول ان ابوك
رأفت	ابويا ……. ابويا انت اللى قتلته ايوه انت اللى قتلته فاكر ……. فاكر يوم ماجيتلك هنا واترجيتك علشان تنقذ ابويا من الموت …… فاكر لما وطيت على ايدك وعلى رجلك ابوسها انك تدينى فلوس علشان العمليه فاكر يا شوكت باشا
شوكت	يا رأفت يا ابن اخويا انت مش فاهمنى اصل انا ......
رأفت	انتا ايه…..انتا ايه انتا عم مش ممكن ….مش ممكن تكون عم مش ممكن تكون غير الشخص اللى ضربنى بالقلم وطردنى من بيته لكن جيه الوقت علشان ارد القلم قلمين واخذ حقى وحق ابويا اللى انت قتلته
شوكت	قصدك ايه
رأفت	اذا كنت عايز تعيش لازم تدينى مليون دولار ........... ايوه مليون دولار
شوكت	بس ده كتير قوى ده كل اللى انا امتلكه ميجيش المبلغ ده
رأفت	لو مش عايز بلاش بس ابقى شوف مين يعملك العمليه دى وتنجح
شوكت	يعنى ات بتستغل الموقف ………. بتستغل مرضى وتساومنى على حياتى
رأفت	سميها زى ما انت عايز .......... انا قضيت عمرى كله وذاكرت وتعبت واشتغلت ليل ونهار علشان اشوف اللحظه دى وكنت مستعد اضحى بحياتى بس اشوفك بتطلب منى الحياه واشوفك بتتلرجانى زى النهارده
شوكت	وضميرك ......... فين ضميرك من ده كله
رأفت	ضميرى .......(( يضحك )) .......... انت بتسألنى عن ضميرى وانت ضميرك كان فين لما كنت بطلب منك الفلوس علشان تنقذ ابويا آة فين كان ضميرك يا باشا
شوكت	يا رأفت
رافت	دكتور رأفت من فضلك ….. وبعدين خلصنى انا مش فاضيلك
شوكت	بس انا مقدرش ادفع المبلغ ده كله ........ وبعدين ايه اللى يضمنى انى العمليه تنجح
رأفت	(( يضحك)) العمليه دى لعبتى وبعدين انا عملتها اكثر من 20 مره قبل كده ونجحت بنسبه 100% وعلى العموم ممكن تدينى نصف المبلغ دلوقتى والنص التانى بعد العمليه
شوكت	يعنى مش ممكن .........
رأفت	(( مقاطعا)) لا مش ممكن وخلصنى بقى
شوكت	حاضر أنا هديلك شيك بنصف المبلغ والباقى بعد العملية
رأفت	أيوة كدة ............. وتحضر الشيك التانى بعدالعملية بأسبوع
شوكت	العملية ممكن تتعمل أمتى
رأفت	خلال 3 أيام ....... تحجزوا المستشفى وتعمل العملية ......... بس خلى بالك حياتك فى أيديا (( يخرج رأفت ويدخل أبونا أنطونيوس ))
أبونا	مساء الخير مالك يا شوت بية
شوكت	لا أصلى متضايق شوية
أبونا	خير فية أية ؟
شوكت	تتصور رأفت أبن أخويا بيساومنى على عمرى عايز يأخذ مليون دولار عشان يعملى العملية ........ عايز ينتقم منى ........... طب لية ........... لية ......... لية كدة
أبونا	مش عارف لية ياشوكت بية أنت مش فاكر اللى عملتة معاة ومع أبوة
شوكت	(( يتكلم بعجرفة )) وأنت مالك أنت اله يا أخى أنا حر أنا وأخويا
أبونا	متنساش يا أبنى أن ما يزرعة الأنسان أياة يحصد وأنت زرعت المال لخلاص نفسك والكتاب المقدس بيقول ++ تمموا خلاصكم بخوف ورعده ++   سامحنى يا أبو بولس ياريت ماتهتمش بالأرضيات ........ وتزرع للأمور السماوية دا حتى ربنا قال :                          ++ أكنزوا لكم كنوزا فى السماء++
شوكت	أنتم بتحقدوا عليا عشان أنا غنى لكن لأ ....... أنا هعرف أزاى أنتقم منكم كلكم أيوه هنتقم منكم كلكم .......... ودلوقتى أخرج بره عشان أنا قرفت منك ومتجيش هنا تانى ......برة......يلا بره
أبونا	أنا خارج بس ياريت تفكر أنك ما زرعتش خير أبدا ..... وأفتكر دة كويس (( يخرج أبونا ثم يدخل شخص يبدو علية المعلمة ))
شوكت	مين يا مريم .
مريم	دا المعلم منصور يا بابا ........ أتفضل يا عم منصور
منصور	مساء الخير يا شوكت باشا عامل أية
شوكت	أتفضل يا معلم منصور
منصور	الف سلامة عليك يا باشا والف لابأس عليك يا باشا
شوكت	الله يسلمك يا معلم منصور
منصور	أية يا باشا مالك أنا عرفت من الجيران أنك تعبان قولت أسأل عليك وخصوصا أنك مش باين بقالك فترة والعربية طول النهار فى الجراج ......... دا حتى بولس بية مشفتهوش اليومين دوله
شوكت	فيك الخير يا معلم منصور ماهو العشم برضة
منصور	أنما قولى عندك أية
شوكت	أسكت اللى عندى ملهوش دواء ولا علاج
منصور	ليه هو الدكتور قالك ايه
شوكت	الدكتور قال لازم عمليه
منصور	عمليه..... للدرجة دى
شوكت	دى عمليه خطيره جدا
منصور	عمليه …….. انا من يوم ما ابنى مات وهو بيعمل العمليه وانا متشائم من كلمه عمليه
شوكت	لا بس ده اللى هيعمل العمليه دكتور لسه راجع من بره وبيقولوا انه عمل العمليه دى كتير ونجحت
منصور	طب وايه يعنى ما انا برضه قالولى نفس الكلام ان الدكتور متخصص وانه شاطر والدكتور هرب من يومها وانا بدور عليه …… اه لو يوقع فى ايدى اه لو طولته كنت اشرب من دمه
شوكت	للدرجه دى انت نفسك تنتقم منه
منصور	واكثر من كده يا باشا ده حرمنى من ابنى الوحيد ……… اه لو طولتك يا رأفت يا حنا كنت اشرب من دمك واقطعك حتت
شوكت	انت قلت ايه ……. اسمه ايه
منصور	اسمه رأفت حنا بولس ........ انت تعرفه
شوكت	ايوه ..... ايوه .... لا......... لا
منصور	طب قولى هو فين اقابله ازاى وامتى وفين
شوكت	انا هخليك تقابل رأفت حنا وتنتقم منه بس اسمع اللى هقولهولك وتنفذه بالحرف الواحد…….. رأفت حنا بولس هو الدكتور الليى   ((تدخل موسيقى عاليه ))

 

 

 ((يفتح الستار على خلفية كنيسة ))

 

أبونا	بسم الأب و الأبن والروح القدس الألة الواحد أمين .... الله ما أجعلنا مستحقين أن نقول لك بشكر يا أبانا الذى فى السموات ......................................................... ألخ (( أثناء ذلك تدخل مريم وتكمل معة الصلاة ))
مريم	أزيك يا قدس أبونا ....... عامل أية.
أبونا	الحمد لله يا بنتى بخير ..... أزى أبوكى و أخوكى عاملين أية كويسين
مريم	بابا كويس …… بس علطول مهتم بشغلة وقاعد فى الشركة وسايبنى لوحدى أما بولس فالأيام اللى فاتت دى وأحنا مش عارفين هو فين وأنا مش عارف أعمل حاجة
أبونا	ياااااة ......... دى أنتى كمان شكلك تعبانة قوى
مريم	أيوة يا أبونا أنا تعبانة الأيام دى بالذات وعشان كدة أنا جيت لقدسك عشان أحكى معاك فى موضوع كدة شاغلنى ومحتاجة رأى قدسك فية
أبونا	أية هوة الموضوع دة قوليلى وأنا بأذن يسوع المسيح هساعدك
مريم	بصراحة كدة يا أبونا أنا عايزة أترهبن
أبونا	تترهبنى لية أية اللى حصل
مريم	مفيش حاجة حصلت يا أبونا ....... بس أنا حاسة أن الدنيا دى غابة ....... أيوة غابة لازم الواحد يكون أسد عشان يعيش ....... الدنيا دى عبارة عن صراع بين البشر وكل البشر بتتصارع عشان حاجة وحدة بس وهى الفلوس ........ أيوة يا أبونا الفلوس دلوقتى بقت حاجة مهمة يتمناها الكل وأنا نفسى أعيش فى دنيا هادئة مفيهاش دوشة ولا صراعات على حاجات أرضية ملهاش قيمة ولا ثمن
أبونا	أيوه يا بنتى الكلام اللى أنت بتقولية دا حلو خالص بس مش علشان مبتحبيش الدنيا ومش طيقاها تقومى تهربى الرهبنة دى شى مقدس و الواحد اللى يروح يترهبن لازم يكون جواه دافع الرهبنة ... لازم تعرفى أن الرهبنة دا شى مش سهل لأنك هتتعرضى لتجارب كتيرة
مريم	بس أكيد ربنا هيكون معايا فى تجاربى دة
أبونا	طبعا يا بنتى ربنا هيكون معاكى ..... شعورك بأن ربنا موجود ممكن يطمنك من جهه عارفة لية لأنة هيسندك لأن الكتاب المقدس بيقول ++ الرب يدافع عنكم وأنتم تصموتون ++ بس أنا خايف من حاجة ...... خايف تكونى عايزة تترهبنى بسبب رأفت اوعى تكونى واخده الرهبنه وسيلة هروب
مريم	لا ابدا يا ابونا انا عمرى ما فكرت فى كده ابدا انا خلاص أخدت قرار عن وع كامل واراده قويه وزى ما قلت لقدسك انى مبحبش العالم ده لانه فانى ………. فاكر يا ابونا الايه اللى بتقول ++ ماذا ينتفع الانسان لو ربح العالم كله وخسر نفسه او ماذا يعطى الانسان فداء عن نفسه++ …. وانا مش مستعده انى اربح العالم واخسر حياتى الابديه …… انا خلاص اتخذت القرار ومش ناويه ارجع فيه تانى
ابونا	طيب يا بنتى مدام انتى مصممه على قرارك ده يبقى خلاص .......... تعالى يا بنتى علشان اصليلك (( يصلى ابونا لمريم ثم يدخل بولس وهو فى حاله متدهوره ويسقط على الارض ويفزع الاب الكاهن وتصرخ مريم ))
بولس	اااااابـــــــــــــــــــــونا .......... مـــــــــــــــــــــريم
ابونا	بولس قوم مالك يا ابنى
مريم	بولس ……… بولس…. مالك يا بولس ايه اللى حصل
ابونا	خليكى معاه ثوانى اروح اجييله كوبايه ميه واجى بسرعه (( يذهب أبونا مسرعا ليحضر الماء وتجلس مريم بجانب بولس وهى تبكى))
مريم	بولس مالك يا أخويا قوم كلمنى ...... قوم يا بولس عشان خاطرى
أبونا	خذ أشرب يا أبنى وخذ الأسبرينة دى معاها.
مريم	مالك يا بولس أية اللى عمل فيك كدة
أبونا	مالك يا بولس أية اللى حصلك ............ أحكيلى قولى فية أية
بولس	أنا ............. أنا مدمن يا أبونا وأنا فى الحلة دى عشان أحاول أبطل الأدمان لدرجة أنى حطيت فلوسى كلها فى البنك فى وديعة عشان مقدرش أسحب منهم ...... لكن ماقدرتش و دلوقتى بحاول أبطل ومش قادر.................. ساعدنى يا أبونا أرجوك ساعدنى
أبونا	لية يا بولس يا أبنى ……….. لية يا أبنى بقيت مدمن وللأسف الأنسان المدمن عمرة ما بيفكر لحظة واحدة فى عواقب الأدمان ……………. عمرة ما بيفكر أنة كدة بيقتل نفسة بنفسة وبطريقة تدريجية لازم تعرف يا بولس يا أبنى أن جسدك دة أمانة ربنا أدهالك لازم تحافظ عليها …… بولس الرسول بيقول : ++ أما تعلمون أنكم هيكل الله وروح الله يسكن فيكم أن كان أحد يفسد هيكل الله فسيفسدة الله لأن هيكل اللة مقدس الذى أنتم هو ++ خليك عارف يا بولس أن السيد المسيح لما جة ومات على الصليب أداك أمانة الأمانة دى هى جسدك فمش من المناسب ولا من الأمانة أن من بعد المسيح ما حررك تصبح عبد للأدمان لأن الرب يسوع لية كل الحق فيك لأنة هو اللى أشترالك ودفع الثمن اللى هو دمة اللى أتسفك على الصليب
بولس	يا أبونا الكلام دا كلة كويس بس أنا كان نقصنى حجات كتير وأهمها حنان الأم والأب ومع الأسف أمى ماتت وأنا صغير وبقيت أنا وأختى لوحدنا عمرنا ما حسينا بحنان الأب ولاعمرة سأل عليا كان همة كلة جمع الفلوس ومص دم الغلابة دا حتى وأنا فى الثانوية كان نفسة أخش كلية الهندسة لكن اللى شفتة دمر حياتى .............. دمر حياتى يا أبونا ....... دمر حياتى (( يقع على الأرض ويبكى ))
أبونا	قوم يا أبنى ........... قوم وقولى أية سبب الأدمان ومين اللى عرفك طريقة
بولس	وبعد كدة يا أبونا أتحولت حياتى لجحيم بعد دخولى الكلية بسبب أصحابى اللى أتصحبت عليهم وعلمونى كل حاجة ........... كل حاجة شريرة لدرجة أنى بقيت مدمن وكنت فاكر أن دا هينسينى أبويا وفشلى لكن بالعكس بقيت مدمن ومجرم لدرجة أنى كنت بمد أيدى على أختى وأنا دلوقتى بحاول أبطل أرجوك يا أبونا ساعدنى .............. ساعدنى يا أبونا (( يبكى ))
مريم	متخافش يا بولس أبونا هيسعدك ويقف جنبك
أبونا	يا بولس يا أبنى حاول دلوقتى أنك تبعد عن الأدمان ومتحطش قدامك أغراءات الشيطان و أوهامة خليك فاكر أن البعد عن الأدمان هو جهاد ضد الشيطان والخطية وصلى من قلبك وأنا واثق أن ربنا هيسعدك وهيطلعك من محنتك لأنة اله حنان ورحوم ...... صلى من قلبك وربنا يساعدك (( يخرج الأب ومريم ويظل بولس على المسرح ليصلى ))
بولس	يارب أنا عارف أن أنا أنسان خاطى وما أرضيتكش طول عمرى لكنى أسألك أن لا تعطنى كشرورى وفساد قلبى بل أعطنى كرحمتك ومحبتك للبشر فأرحمنى يارب ونجينى من كل تجربة وكل فعل شيطان وأرحم ضعف عبدك لأنك اله رحوم وطويل الروح وأنقذنى يارب من محنتى حتى يتمجد أسمك لأنك قولت فى كتابك المقدس : ++ أدعونى فى وقت الضيق أنقذك فاتمجدنى ++   لأن لك القوه والمجد الى الأبد آمين .

(( يفتح الستار عللى منظر بيت شوكت وتظهر مريم وهى تصلى وبجوارها شنطه))

مريم	يا رب يسوع المسيح اشكرك لانك اله عظيم واشكرك من اجل اخويا بولس لانك شفيته يا رب ارشدنى لكى اكرس حياتى لك بشفاعه امك الطاهره القديسه العذراء مريم وجميع سائر قديسيك امين (( واثناء ذلك يدخل بولس ))
بولس	خلاص هتمشى يا مريم وتسيبينى ...... انا محتاجلك
مريم	ربنا يساعدك يا بولس يا اخويا انت دلوقتى خلاص ميتخافش عليك
بولس	بصراحه ابونا انطونيوس مسابنيش لحظه انا بشكر ربنا انه بعتهولى
مريم	ربنا معاك......... انا لازم امشى دلوقتى
بولس	اذكرينى فى صلواتك وانا هبقى اجى ازورك فى الدير ((تسلم مريم على بولس وتخرج ثم يدخل الاب وهو فرحان))
شوكت	مشيت اللى عامله نفسها قديسه
بولس	مشيت يا بابا
شوكت	ابقى قولها تاخدنى على طرف جناحاتها (( لحظه صمت ))............. اخيرا الواحد هيرجع لشغله وحياته .... ياه الايام اللى فاتت كانت مش عايزه تنتهى لكن اخيرا الواحد يقدر يتحرك ويطلع ويدخل فى الشركه ويعمل اللى هو عايزه ولا عاد فى ادويه ولا حتى دكاتره .......... بس الواد رأفت هيجى النهارده وفاكلر انه هياخذ باقى فلوسه لكن انا هاديله درس عمره ما ينساه
بولس	ليه يا بابا ماتديله حقه
شوكت	كفايه عليه اللى خده نصف مليون دولار كثير قوى عليه هو عمل ايه يعنى علشان ياخذ ده كله
بولس	يابابا انا نفسى نقرب من ابن عمى ونديله حقه وحق عمى
شوكت	انت كنت فين وايه اللى جرالك
بولس	كنت فى الكنيسه
شوكت	لا ....... انت من سعه ما خفيت من مرضك ده وانت اتعديت من اختك وكله من ابونا اللى اسمه ايه ده ......... انا الراجل ده ماببلعهوش مش عارف ليه
بولس	بالعكس انا بشكر ربنا على انه بعتلى ابونا انطونيوس لانه كان السبب فى انى ارجع لربنا ..... احسن حاجه ان الواحد يروح الكنيسه ويعترف ويتناول يا ريت تجرب يا بابا
شوكت	لايا ابنى فى حاجات اهم من كده بكتير لازم الواحد يفكلر فيها ويعيشها……… مثلا ترجع الشركه معايا تانى بدل ما انت مضيع وقتك على الفاضى
بولس	صدقنى يا بابا انا سعيد جدا بحياتى مع ربنا وياريت انت كمان تعيشها وتفتكر ان ربنا هو اللى شفاك من مرضك الخطير
شوكت	شفانى ازاى…… اللى شافتنى هى فلوسى لو مكانش معايا فلوس مكانش ممكن اعمل العمليه
بولس	لا يا بابا ده ربنا هو اللى خلاى الدكتور رأفت ابن عمى علشان يعملها
شوكت	لا ابدا ..... صحيح هو اللى عمل العمليه لكن ده بتعبى وشقايا وفلوسى
بولس	ياريت يا بابا لما يجى رأفت تبقى تديلة باقى فلوسة
شوكت	بقى أية يا أخويا ………… هو لسه فى باقى فلوس مش كفاية اللى خدة
بولس	قصدك أيه يا بابا ........ أنت مش هتديلة الفلوس
شوكت	أنا هوريك لما يجى هعمل معاة أية
بولس	بس يا بابا ....... (( يقاطعة ))
شوكت	بس خلاص ........ سيبنى أنا أتصرفمع الأشكال دى وكفاية علية قوى اللى خدة (( يرن جرس الباب )) ...... روح أفتح الباب
بولس	حاضر يا بابا (( يذهب ليفتح الباب ويدخل رأفت )) .. أهلا وسهلا يا دكتور رأفت أتفضل
رأفت	شكرا (( يدخل وينظر لعمه))…… طبعا حاله المريض كويسه باين عليه .. على العموم ده شئ متوقع
شوكت	اهلا وسهلا يا دكتور شرفت بيتنا ........ سيبنا لوحدنا يا بولس
رأفت	انا جاى النهارده حسب الميعاد ....... يا ريت بقى الشيك بسرعه علشان انا مستعجل
شوكت	شيك....... شيك ايه
رأفت	الله…….. الشيك اللى بعد العمليه اللى بنص مليون دولار
شوكت	ما انت اخذته
رأفت	اخذته ازاى……. انا قصدى الشيك اللى بعد العمليه
شوكت	انا شايف ان شيك واحد كفايه
رأفت	قصدك ايه
شوكت	قصدى ان نصف مليون كفايه قوى عليك وبعدين انت هتنهب
رأفت	افهم من كده انك بتفكر ترجع فى كلامك
شوكت	حاجة زى كدة
رأفت	أوعى تفكر لحظة أنى ممكن أسكت وأنك ممكن تخدعنى ....... فاهم
شوكت	أنا فاهم حاجة وحدة بس أنى عملت العملية وخلاص .
رأفت	أنت فاكر أنك ممكن تخدعنى أو تضحك عليا …….. لا يا عمى دا أنا لحمى مر فاهم ……. والفلوس بالذوق بالعافية  هاخدها (( يرن جرس الباب ))
شوكت	يا بولس ....... يا بولس تعالى أفتح الباب حاضر يا بابا (( يفتح بولس الباب ويدخل المعلم منصور )) ........ أهلا ..... أهلا يامعلم منصور
منصور	أزيك يا شوكت باشا ...... أنا جيت أطمئن عليك وخصوصا لما لمحت عربية الدكتور واقفة تحت
رأفت	أنت بتكلمنى أنا
منصور	أيوة يا دكتور دا أحنا معرفة قديمة مع بعض بقالى زمان عمال أدور عليك فى كل حتة وفى كل مكان
رأفت	أنا مش فاهم حاجة
شوكت	أنا أفهمك ......... فاكر يا دكتور رأفت فاكر وأنت فى سنة الأمتياز عملت عملية لطفل أسمة مينا منصور جرجس والطفل دا مات وهو فى أوضة العمليات ........ ودلوقتى أقدم لك أبو الطفل منصور جرجس
رأفت	مش أنا ....... صدقنى مش أنا
منصور	أنا هاقتلك وهشرب من دمك زى ما قتلت أغلى حاجة فى حياتى
رأفت	مش أنا ......... أنت فاهم غلط
منصور	أنا هاقتلك (( يرفع السكينة ليضرب بها رأفت فيفادية بولس ثم يموت بولس وهو يقول))
بولس	آآآآآآآآآآآآآةةةةةةةةةةةةةةةةةة....................................آآآآآآآآآآآآآآآآآآآآآآآآآآةةةةةةةةةةةةةة
شوكت	ولدى ... ولدى ......... بولس رد عليا يا أبنى ...... رد عليا يا بولس
بولس	بلاش يا والدى تزرع لحاجات أرضية فانية وأعرف أن محبة المال أصل لكل الشرور وحاول يا بابا تقرب من ربنا لأن مفيش أحن منة وخليك فاكر كلام الأنجيل اللى بيقول : ++ فأن الذى يزرعة الأنسان أياه يحصد أيضا ++
شوكت	ولدى ...... ولدى ....... آة ..... آة سامحنى يا بولس يا أبنى أنا السبب فى موتك يا أبنى لأنى رميت بذرة الشر بأيدى وفى النهاية حصدت دم ...... وهو دم موتك يا أبنى ... آةةةةةةةةة.

 

 

1-   الأب العجوز :

2-   الابنة ( مديحة ) :

3-   رأفت :

4-   شوكت :

5-   الابنة (مريم ) :

6-   بولس :

7-   الدكتور :

8-   الأب الكاهن :

9 -  المعلم منصور :

10- المهندس أيمن :   11- صوت(أمين ):