اسكتش عن فضيلة الطاعه
اسكتش قصير " يمكن تحويله لمسرح عرائس"
عن فضيلة الطاعة
بعنوان 😃إشمعني أنا 😃 ينفع لحفله تخرج الحضانة
لو في اي جمله مش مناسبه ممكن نغيرها عحسب المرحله اللي هتستقبل الاسكتش
تأليف : ميلاد نبيل
++++++++++++++" يظهر المسرح وعليه ثلاث عرائس هم الأم وسامي وسامية أبنائها "
الام : قوم ياسامي روح جيبلي كيلو رز عشان اعملكم الغدا
سامي : ايه ياماما انتي مش شايفاني بلعب بالموبايل يعني مش فاضي
الام : تلعب بالموبايل الله هو الموبايل ده بيتلعب بيه ولا بيتصلوا بيه
سامية : ياماما هو المفروض انه بيبتصلوا بيه لكن بقي استاذ سامي بيلعب بيه لحد ماهيبوظه لبابا
سامي : ملكيش دعوي انتي بابا عارف وموافق
الام : بابا موافق عشان مبيحبش يشيل عنكم حاجة وبعدين انت هتوهني في الكلام قوم يالله روح جيب الرز
سامي : ابعتي سامية ياماما اهي قاعدة فاضية اهي
سامية : ياسلام وانت يعني اللي قاعد بتذاكر وبعدين انا لسه جاية من برة كنت بشتري كبريت يعني انت اللي عليك الدور
سامي : بصوا انا مش خارج واللي عندكم بقي اعملوه
الام : انت ياواد عارف لو مروحتش ههريك ضرب
سامية : وهو ده بيحس ياماما
سامي : بس يابت انتي
الام : انت وهي ايه الكلام اللي بتقولوه ده انتي تقولي مبيحسش وانت تقولها يابت ايه هو ده اللي احنا ربيناكم عليه ولا هو ده اللي بتاخدوه في مدارس الاحد ماشي انا بقي هقول للمس لما تعدي علي اللي انتوا بتعملوه
سامي : ياسلام وهي هتعمل ايه بقي انشاء اله المس هتقولنا كدة عيب ياولاد وكبيرها قوي تحرمنا م الحاجة الحلوة عادي نبقي نشتري من برة
سامية : هو ده اللي همك لا ياماما معلش متقوليش للمس انا مبحبهاش تزعل مني ومش هعمل كدة تاني
الام : لا طبعا هقولها لاني مينفعشي اكدب عليها ويالله حد منكم يقوم يجيب الحاجة ابوكم زمانه جاي م الشغل ومش معقولة يجي ميلاقيش حاجة ياكلها عشان خاطركم
سامية : ماما متقوليليش انا انتي عارفة ان هو اللي عليه الدور
سامي : وانا مش رايح اجيب حاجة واساسا بابا مش هيعمل لي حاجة لو عرف اني مجبتش لانه بيحبني
الام : بقي كدة ماشي اروح انا اروح انا اجيب طالما انتوا مش عاوزين تتحركوا ولما ابوكم يجي بقي نبقي نشوف هيعمل حاجة ولا لا
( تنزل الام وتظهر عروسة للاب ويقول )
الاب : إزايكم ياولاد هات ياسامي الموبايل عشان عاوز اكلم ناس ( ياخد الموبايل ويلاقيه فاصل شحن )
الاب : كدة كدة ياسامي خلصت الشحن بتاع الموبايل عشان عمال تلعب فيه مع اني منبه عليك متلعبشي فيه اعمل ايه انا دلوقتي بقي انا محتاج اكلم ناس ضروري وهو هياخد وقت عقبال مايتشحن
سامية : انا قعدت اقول له بابا هيزعل قال لي ملكيش دعوي وبابا بيحبني
بابا : بحبك حاجة واسيبك تبوظ الحاجة دي حاجة تانية هي ماما لسه في المطبخ ولا ايه
سامية : لا دي ماما خرجت يابابا
الاب : خرجت خرجت راحت فين
سامي : راحت راحت تشتري حاجة وجاية علي طول
الاب : ايوة حاجة ايه الي راحت تشتريها
سامية : راحت تشتري رز يابابا
الاب : ومحدش فيكم راح يجيب بدالها ليه
سامية : يابابا سامي اللي كان عليه الدور وقعد يلعب ف الموبايل ومرداش خالص يروح يجيب
الاب : الله الله يعني انت تقعد تلعب في الموبايل وتبوظه وكمان مش راضي تجيب لماما الاكل اللي هي بتعمله عشانك ماشي محروم م المصروف وم اللعب ومن مدارس الاحد
سامي : ايه يعني مش هاخد المصروف بتاعي لحد امتي بقي انشاء الله
الاب : ولد اتكلم عدل
سامية : وبعدين هو ده اللي همك ان المصروف هتتحرم منه ومش همك انك مش هتروح الكنيسة
سامي : ياستي كنيسة ايه
الاب : ماشي طيب هتروح بقي مدارس الاحد بس انا هخلي المس تعملك امتحان في الحاجات اللي بتاخدوها ولو عرفت انك محليتش كويس مافيش مصروف لمدة شهر
سامية : احسن
الاب : وانتي ياسامية فرحانة في اخوكي هو ده الادب وانتي برده هتتعاقبي لانك سيبتي ماما تروح هي تجيب الحاجة وانتي موجودة وعقابا ليكي بقي مش هتروحي مدارس الاحد يوم الجمعة وهتعملي الاكل بدذل ماما انهاردة
سامي : يابابا انت كدة بتعاقبنا احنا لاننا هناكل من ايديها
الاب : ومين قال لك اساسا انك هتاكل مش انت مرديتش تروح تجيب الرز ابقي شوف مين هياكلك
( الاتنين يعيطوا وتدخل الام )
الام : بتعيطوا احسن عشان تبطلوا اللي انتوا بتعملوه ده
الاب : يالله يا سامية قومي اعملي مع ماما الاكل يالله بسرعة وانت ياسامي مش ناوي تاكل لو عاوز تاكل بقي طلع من مصروفك وروح اشتري لنفسك حاجة وريني بقي مين هيروح يجيبلك
الام : خلاص بقي يابو سامي مش مشكلة اخر مرة ومش هيعمل كدة تاني
الاب : احنا كل مرة بنقول اخر مرة وبرده مبيتعلموش حاجة لازم يتعاقبوا عشان ميكرروش اللي عملوه ده تاني
( يدخل الاب الي الداخل وتدخل الام الي الداخل ايضا وتقول سامية لها )
سامية : انا جاية وراكي اهو ياماما
( ثم تقول لسامي )
سامية : انت مش متضايق ياسامي
سامي : طبعا متضايق انتي مسمعتيش بابا بيقولك حرمان م المصروف و ...
سامية : يابني انت انا قصدي مش متضايق عشان ماما وبابا زعلانين مننا
سامي : بصراحة اه اصلهم بيحبونا قوي وانا حاسس اننا كدة بطلنا نحبهم
سامية : طيب فكر معايا نعمل ايه عشان نصالحهم
سامي : خلاص انا هقولك علي حاجة انتي دلوقتي تخشي وتعملي الاكل كله لوحدك كله هه وتطلعي ماما برة
سامية : ياسلام وانت بقي هتعمل ايه
سامي : بصي انا كنت محوش فلوس من مصروفي انا هروح اجيب بيها فاكهة وحاجة حلوة لماما وبابا وبليل هرومح انا اجيب العشا ومش هخلي بابا يخرج يشتري
سامية : خلاص وانا موافقة
( تختفي عروسة سامي وسامية من علي المسحر وتظهر الأم والأب ليقولوا لأطفال الخدمة )
الاب : شفتوا ياولاد سامي وسامية هيعملوا ايه
الام : لازم ياولاد احنا كمان نعمل زيهم ومنزعلشي بابا او ماما منا خالص
الاب : ولما ماما تطلب مننا حاجة نشتريها نروح علي طول ومنقعدشي نقول لا انا تعبان ولا انا قاعد بتفرج ع التليفزيون
الام : وعلي فكرة انا برده هخش اساعد سامية لانها خلاص اتعلمت من غلطها
الاب : وكمان سامي ياولاد لما يرجع من برة انا هخليه ياكل معانا وكمان هديله مكافاة عشان اللي هو عمله ويالله سلام بقي عشان هنخش نتغدي باي باي
#كل_جديد_من_افكارينو😍